Marta Lois reiterou hoxe que “Compostela Aberta apoiará a opción para Peleteiro que suscite o consenso de veciñanza e comerciantes, pero a día de hoxe ese consenso non existe”. Ao remate da Comisión Mixta celebrada hoxe, a portavoz de CA reiterou que “na reunión vimos ao Bugallo de sempre, que aposta máis polo trilerismo que polo diálogo, e que mesmo chega a afirmar que a opción para a parcela acordada no pasado mandato non é viable técnicamente, antes de ter os informes correspondentes”.
A portavoz de Compostela Aberta insistiu hoxe en que “Bugallo non conseguiu ainda a solución consensuada para Peleteiro que se comprometera a presentar nos tres primeiros meses do mandato, e a única opción que parece valerlle a todo o tecido social e comercial do Ensanche é a mesma que o PSOE tumbou no pasado mandato”. Para Marta Lois, “non é certo que exista xa un acordo, como nestes días quixo trasladar o alcalde, porque a veciñanza segue sen apoiar a opción de abrir a praza de Peleteiro cara San Pedro de Mezonzo, ata o punto de que se vén de anunciar a creación dunha plataforma para reivindicar o proxecto acordado en 2019”. A concelleira lamentou que “despois de tres anos de mandato, a Bugallo estanlle entrando as presas, e a súa estratexia para sacar adiante o proxecto non é a do diálogo, senón a do trilerismo político”.
Posición prefixada de Bugallo
Lois sinalou que “Bugallo debe explicar cales son as verdadeiras razóns polas que non acepta a opción que segue sendo a que suscita maiores consensos, e por que hoxe chegou a afirmar na Comisión Mixta que esa configuración é inviable técnicamente, ao mesmo tempo que anunciaba a solicitude de informes técnicos sobre as diferentes alternativas para Peleteiro que non se coñecerán ata a próxima semana”.
A portavoz de Compostela Aberta insistiu en que “o noso grupo municipal terá unha actitude responsable cos intereses da cidadanía, e por iso mantémonos na nosa posición de respaldar a alternativa que consiga o consenso de todos os afectados, do tecido comercial pero tamén do tecido veciñal do Ensanche”.
