- CA quere coñecer o grao de cumprimento do acordo de remanentes de 2020 antes de concretar propostas “que priorizarán a axuda ás persoas e ao comercio e as obras para a veciñanza e non para os turistas”
“Coa súa proposta para a distribución dos remanentes de 2021, o Goberno está a confesar a súa incapacidade e a nula xestión que fixo ao longo do ano pasado, xa sen a escusa da Covid”. Así de contundente se mostrou hoxe a portavoz municipal de Compostela Aberta, Marta Lois, que denunciou que “sete de cada dez euros dos remanentes serán para pagar as facturas pendentes de Bugallo”.
Tal e como anunciou no Pleno do pasado xoves, o Goberno fíxolle entrega aos grupos da oposición da súa proposta para a distribución do remanente líquido de tesourería de 2021. A portavoz de CA incidiu en que “dos máis de 23,2 millóns de euros de remanentes, 16 millóns están xa comprometidos para gastos que teñen moito que ver coa incapacidade dos autodenominados bos xestores, gastos que o Goberno debería explicar con maior claridade”. Para Marta Lois, “non hai nada que xustifique que se destinen case 6,4 millóns de euros a facturas pendentes, 230.000 euros á amortización de xuros e comisións que non foron abonadas en prazo, e mesmo 1,3 millóns de euros para intereses de sentenzas pendentes de pagar”. O Goberno tamén prevé pagar con cargo a remanentes as horas extras da Policía Local e dos Bombeiros que están pendentes de 2021, “e que non se pagaron ainda cando da liquidación do orzamento de 2021 se extrae que o Goberno non gastou tres millóns de euros do que tiña orzado no capítulo de persoal”; e as axudas a diferentes entidades pendentes de abono, e que superan o 1,3 millóns de euros. Marta Lois sinalou que “estas previsións do Goberno son aínda máis incomprensibles se temos en conta que os orzamentos de 2022 están en vigor desde o pasado mes de marzo”.
Auditoría dos remanentes de 2020
Na proposta de reparto de remanentes do Goberno tamén se inclúen case 1,8 millóns de euros para obras de remanentes de 2019 que quedaron sen saldo. Para Marta Lois, “este é un exemplo máis do que vimos denunciando desde Compostela Aberta e do que cada vez é máis evidente: o mito dos bos xestores caeu polo seu propio peso”.
A portavoz de CA avanzou que “vendo estes datos, o noso grupo municipal vén de solicitarlle ao Goberno que realice unha auditoría sobre o grao de cumprimento do acordo de remanentes de 2020”. Para Marta Lois, “esa análise debe ser o paso previo para negociar os remanentes de 2021, porque non ten sentido que incluir propostas e xerar expectativas entre a veciñanza se sabemos que finalmente non se van executar”.
Compostela Aberta, sinalou Marta Lois, “afronta este proceso para a negociación dos remanentes con dúas ideas claras: este diñeiro debe ser para manter as axudas ás persoas e ao pequeno comercio nun momento que segue a ser de fonda crise económica, e as obras que se incorporen ao reparto teñen ue estar pensadas para a veciñanza e non para o turismo, que claramente segue sendo a prioridade do Goberno de Bugallo”.
