- A portavoz de Compostela Aberta lamenta que o Goberno de Bugallo repita a actuación que xa acometera o Goberno de Conde Roa na dársena
- CA reclama que “as cuestións estéticas non se poñan por diante da xustiza social e da atención ás persoas en situación de senfogarismo”
Compostela Aberta expresou hoxe o máis rotundo rexeitamento á actuación que o Goberno local vén de iniciar na dársena de Xoán XXIII, para evitar a presenza de persoas sen fogar. A portavoz municipal, Marta Lois, lamentou que “o PSOE de Bugallo volva demostrar o preto que está da dereita, e copie as fallidas receitas do Goberno de Conde Roa en materia de senfogarismo”. Nesa liña, a concelleira recordou que xa en 2013, o PP acometeu unha actuación similar na dársena “que evidentemente non cconseguiu solucionar a situación das persoas sen fogar, que unicamente se trasladaron a outro punto do mesmo estacionamento”.
Marta Lois foi moi crítica co tapiado da dársena, que CA non apoiou tampouco na Comisión Asesora de Patrimonio, na que PSOE e PP se xuntaron na defensa do proxecto. A portavoz de Compostela Aberta lamentou os argumentos do Goberno de Bugallo “que recoñece abertamente que estas obras só teñen como obxectivo mellorar a imaxe da cidade diante dos turistas, pero que en ningún momento pensa en mellorar a situación das persoas sen fogar, que non van desaparecer porque se tape o lugar que utilizan para durmir”. De feito, engadiu, “temos ao concelleiro de Obras presentando o proxecto, mentres que a responsable de Políticas Sociais, Mila Castro, está desaparecida”.
Proxecto fracasado do PP
A actuación na dársena de Xoán XXIII é moi similar á que en 2013 acometeu o PP, “que tamén deixara esta problemática nas mans da concelleira de Obras”. Daquela, o Goberno de Conde Roa instalou unhas xardineiras para evitar o paso das persoas sen fogar, que acabaron buscando alternativas para durmir noutros puntos da mesma dársena.
Marta Lois lamentou que “Bugallo, como fixo Conde Roa, afronte a situación na dársena do punto de vista da estética, cando falamos dunha cuestión de xustiza social, cando o importante é a situación das persoas sen fogar, que se durmen en Xoán XXIII é porque segue sen haber opcións válidas para elas”. A concelleira de CA lembrou que “a única decisión que adoptou o Goberno do PSOE nestes tres anos en materia de senfogarismo foi desbotar o proxecto impulsado polo Goberno de Compostela Aberta para crear un Centro Municipal de Atención Integral ás Persoas sen Fogar, que ía ser financiado con fondos europeos e que fora consensuado con entidades sociais e coas propias persoas sen fogar”. Lois incidiu en que “a concelleira Mila Castro debería empezar a explicar que vai pasar con eses cartos, porque a realidade é que o seu mandato está chegando á súa fin, os fondos europeos seguen parados, e as persoas sen fogar seguen sen recibir as solucións que precisan”.
