• A portavoz de Compostela Aberta convida ao alcalde a levar mañá mesmo a Pleno o expediente dos remanentes de 2020 “porque sabe que terá o noso apoio se destina a súa cantidade íntegra ás axudas directas aos sectores máis damnificados pola Covid”

A portavoz de Compostela Aberta cualificou hoxe de “impresentable” que o alcalde queira escudarse nunha suposta negociación coa oposición para xustificar o atraso na convocatoria de novas axudas aos sectores máis prexudicados pola crise da Covid-19. Marta Lois incidiu en que “non hai máis responsable que un Goberno que segue demostrando a súa incapacidade, que fixo as contas da leiteira cos remanentes, vendendo durante meses que tiña cinco millóns de euros dispoñibles, e que acaba de percatarse de que terá menos da metade desa cifra”. A concelleira de CA lembrou que “o 23 de marzo os grupos da oposición chegamos a un acordo unánime sobre a distribución dos remanentes que o alcalde aceptou, pero que non pode executar porque foi el o que presentou uns números que non cadraban”. En todo caso, Lois invitou ao Goberno a “levar mañá mesmo o expediente dos remanentes a Pleno, porque sabe que terá o noso apoio se destina todo o diñeiro dispoñible ás axudas directas”.

Marta Lois explicou foi o alcalde quen empezou a falar dos remanentes en febreiro, “poñendo sobre a mesa cinco millóns de euros que, dous meses despois, descubrimos que son menos da metade”. A portavoz de CA incidiu tamén en que xa en marzo, Bugallo falou cos colectivos de comerciantes e hostaleiros para dicirlles que a convocatoria de axudas que tiña que saír a finais dese mes se podía atrasar unhas semanas mentres se negociaba coa oposición o destino dos remanentes. A oposición, incidiu Lois, “foi responsable como o leva sendo desde o inicio da pandemia, e o 23 de marzo xa tiñamos unha postura unánime sobre o reparto dos remanentes. O problema é que 14 días despois, ese reparto non pode ser executado porque os 5 millóns que se nos dixo que había dispoñibles, son en realidade menos da metade”. Polo tanto, reiterou, “se non está feita a convocatoria de axudas que o alcalde prometeu para finais do mes de marzo, é únicamente pola incapacidade dun Goberno que cada día que pasa demostra con máis forza que aquilo dos bos xestores non era máis que un mito”.

A concelleira reiterou que a petición de Compostela Aberta é que o Goberno cumpra a súa palabra, a que lle deu aos grupos da oposición e tamén aos sectores da hostalería e do comercio, e que convoque novas axudas directas por un total de 3,5 millóns de euros. Para iso, dixo Marta Lois, “o equipo de Bugallo terá que procurar as fórmulas máis acaídas: destinar ás axudas os 2,5 millóns de euros que supostamente temos de remanentes de 2020, renunciar a algún dos investimentos pendentes con cargo aos remanentes do 19 e que aínda non foron executados, ou prever algún modificativo dos orzamentos deste ano 2021 que están aprobados inicialmente”. A portavoz de CA reclamoulle a Bugallo “que deixe de practicar o trilerismo, que deixe de culpar á oposición dos seus incumprimentos, e que se poña a traballar con seriedade, porque sabe que o noso grupo ben sendo sumamente responsable desde o inicio desta pandemia e seguiráo sendo, polo ben da cidade, e polo ben dos sectores que peor o están pasando nesta crise”.

 

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies