Compostela Aberta propón que o Concello impulse un concurso para ocupar os máis de corenta postos que están baleiros nas naves da Praza de Abastos, dándolle prioridade a proxectos de economía social e que permitan a inserción laboral de persoas desempregadas de longa duración, nomeadamente mulleres. A concelleira Marta Lois explicou que este proceso “debería ir acompañado da posta en marcha dunha liña de axudas específicas, que tería como obxectivo revitalizar o mercado mantendo o seu carácter tradicional e evitando un modelo orientado únicamente ao turismo”.
Marta Lois defenderá no próximo Pleno unha moción “que tén como obxectivo procurar fórmulas para coidar a Praza de Abastos, conservando o seu principal valor: a aposta polos produtos de proximidade e de calidade”. A concelleira de Compostela Aberta incidiu en que “ainda que o mercado sexa o segundo lugar máis visitado de Santiago, non podemos caer na súa turistificación, e non podemos permitir unha mudanza dos usos que acabe destruíndo a súa esencia”. Nesa liña, Lois sinalou que “a Praza tén que apostar pola innovación e por ampliar a mellorar a súa oferta e os seus servizos, e iso é incompatible con manter os postos que están pechados a día de hoxe”. Tal e como explicou, na actualidade están baleiros máis de corenta postos nas distintas naves, “unha situación que obriga ao Concello a ser proactivo”.
Para darlle unha saída a eses postos, Compostela Aberta propón que o Concello impulse un concurso no que se prioricen, por unha parte, proxectos vinculados coa economía social e, por outra, aqueles que partan de colectivos en situación de desemprego de longa duración, nomeadamente mulleres. Marta Lois sinalou que ese proceso debera ir acompañado dun programa de axudas “que facilite a posta en marcha deses proxectos, vinculados á economía social e á promoción de productos locais, de comercio xusto, de produción ecolóxica ou tradicionais galegos”. A concelleira de CA apostou porque este proceso “se desenvolva coa participación do tecido asociativo veciñal, comercial, universitario, e en xeral coa cidadanía, para que sexan participes no deseño, elaboración e implementación desta iniciativa, que sería pioneira en Compostela e que sería positiva nunha dobre vía: a revitalización da Praza, e a aposta pola creación de emprego e o emprendemento”.