Marta Lois pide a divulgación da figura de Concepción Arenal, no seu segundo centenario

  • Compostela Aberta propón que o Goberno deseñe unha programación específica para dar a coñecer a obra e o pensamento da escritora, intelectual, penalista e feminista
  • O grupo de CA pide unha nova escultura coa figura da autora, de maior porte que a actual e que ocupe un lugar máis destacado da cidade

Compostela Aberta levará ao Pleno do próximo mércores unha moción na que insta ao Goberno a divulgar a figura de Concepción Arenal, con motivo do 200 aniversario do seu nacemento. Marta Lois deu a coñecer hoxe a iniciativa, “que pretende poñer en valor a obra e o pensamento da escritora, intelectual, penalista e feminista; renovando un recoñecemento que Santiago xa lle ten feito dándolle o nome de Concepción Arenal a unha rúa, á biblioteca central da USC no Campus VIda ou ao ambulatorio do Ensanche”. A concelleira de CA enmarcou esta proposta “na necesidade de seguir reivindicando que Compostela é Territorio das Mulleres”.

Marta Lois incidiu na “grande transcendencia da vida, do compromiso e da obra de Concepción Arenal, que foi precursora de moitas das conquistas das mulleres de décadas posteriores”. A concelleira salientou que a escritora “foi unha adiantada ao seu tempo, loitou por ter as mesmas oportunidades que na súa época só tiñan os homes, e de feito desafiou as normas da época estudando Dereito na Universidade Central, vestida con roupas masculinas porque as mulleres non podían acceder entón aos estudos superiores”. Ademais, Marta Lois recordou que Concepción Arenal foi unha das promotoras da asociación das “Magdalenas”, que traballaba coas mulleres presas para, entre outras cuestións, explicarlles o Código Penal vixente; e puxo o acento no “pacifismo e humanitarismo que caracterizaron o pensamento de Concepción Arenal, que sempre reclamou o protagonismo das mulleres en todas as esferas da vida social”

Programación específica e nova escultura

Na moción que será debatida no Pleno do mércores, Compostela Aberta insta ao Goberno a encargar unha nova escultura coa figura de Concepción Arenal, de maior porte que a que existe na actualidade e que está localizada na porta da Pena, xusto na cima da Costa Vella. O grupo municipal de CA demanda que esa escultura sexa instalada nun espazo público máis destacado da cidade.

Ao tempo, a proposta de Marta Lois urxe ao Goberno a deseñar unha programación específica sobre Concepción Arenal na Casa das Mulleres “Xohana Torres”, para mostrar as facetas da súa obra literaria, ensaística e feminista. Para iso, proponse que o Concello estableza as necesarias canles de diálogo e participación co tecido asociativo cultural, veciñal e feminista, para que sexan partícipes da celebración do 200 aniversario do nacemento da escritora.

PODES CONSULTAR AQUÍ A MOCIÓN DE COMPOSTELA ABERTA PARA A CELEBRACIÓN DO BICENTENARIO DO NACEMENTO DE CONCEPCIÓN ARENAL

Novas
relacionadas

CA insta ao Pleno a defender os dereitos sexuais e reprodutivos das mulleres e a rexeitar protocolos antiabortistas

Marta Lois advirte que “o acontecido en Castela e León semella non ser un caso illado senón responder a un intento de retroceder nas conquistas dos dereitos das mulleres co que o presidente da Xunta se tén mostrado comprensivo”

Marta Lois: “O Goberno de Bugallo non pode seguir mirando para outro lado ante os incumprimentos coas traballadoras do SAF”

A empresa adxudicataria do Servizo de Axuda no Fogar segue sen actualizar os salarios das empregadas, e non lle deu cumprimento aos acordos relacionados con melloras organizativas

Compostela Aberta pide a posta en marcha dun Plan Municipal de Saúde Mental

Marta Lois propón un programa de prevención dirixido a escolares “para atender á preocupación crecente nos propios centros educativos”

“Non hai nada que aguantar”: CA súmase ao 25N cunha campaña que reivindica ás mulleres do rural “empoderadas fronte ás violencias machistas”

O lema é unha mensaxe que xurdiu nos obradoiros de empoderamento das mulleres do rural impulsados no pasado mandato

PARTICIPA

gRUPOS
DE TRABALLO

Selecciona a túa preferenza*
Podes participar en varios Grupos de Traballo