- Compostela Aberta achegará un documento coas súas propostas para os orzamentos a próxima semana
O portavoz do grupo municipal de Compostela Aberta mostrou hoxe a súa preocupación polo atraso na elaboración dos orzamentos municipais de 2020, despois dun primeiro encontro co Goberno no que nin sequera foi presentado un primeiro borrador do documento. Martiño Noriega expresou o seu convencemento de que “será imposible que se aproben as contas a finais deste mes, porque non hai un borrador fiscalizado e porque están sen aprobar os orzamentos sectoriais de Incolsa, Tussa e o Auditorio de Galicia, paso previo necesario para levar ao Pleno o orzamento consolidado do Concello”.
O portavoz de Compostela Aberta e a concelleira Marta Lois mantiveron esta mañá unha primeira reunión sobre os orzamentos municipais de 2020 coa concelleira de Economía e Facenda, Marta Abal, e co concelleiro de Presidencia, Gumersindo Guinarte. Tal e como explicou Martiño Noriega, “no encontro falouse globalmente das grandes cifras das contas, pero o Goberno non fixo entrega de ningún borrador nin de ningún documento que poida ser avaliado polo noso grupo municipal”. Para o concelleiro, “este atraso está totalmente inxustificado, e fai imposible que se cumpran os prazos que se empeña en dar o alcalde Bugallo para levar as contas ao Pleno”.
Actitude proactiva de CA
Martiño Noriega explicou que a xuntanza discorreu nun clima positivo, “nun espazo distendido que responde á interlocución previa para o acordo sobre as ordenanzas fiscais”, ainda que Compostela Aberta fixo constar “a preocupación por este atraso inxustificado, tanto na elaboración das contas como nos contactos cos grupos da oposición que arrancan a 10 de xaneiro cando no pasado mandato iniciabamos as reunións a comezos do mes de outubro”.
O portavoz de CA explicou que “a vontade do noso grupo municipal é a do diálogo e a de ser proactivos, pero tén que haber unha reciprocidade por parte do Goberno, máis alá do bo tono nas xuntanzas”. Nesa liña, adiantou que a próxima semana Compostela Aberta farálle chegar ao Goberno un documento coas súas propostas e demandas para a inclusión no proxecto de orzamentos. Tamén a próxima semana, está prevista unha segunda reunión entre o Goberno e o grupo municipal de CA, na que Martiño Noriega agarda “que se poida falar sobre documentación e sobre aspectos concretos”
