O Concello de Santiago anunciou este luns que Setex Aparki, a anterior concesionaria do servizo de ORA e guindastre, retirou o seu recurso contra a municipalización. Isto súmase a que o goberno central decidiu non presentar recurso contra a recuperación do servizo, tras analizar a documentación solicitada ao Concello.
Como explicou o alcalde Martiño Noriega, quedan así desbotadas “as dúas vías fundamentais para presentar recurso contra a municipalización, unha por parte das administración públicas e outra polo sector privado”, o que envía “unha mensaxe de tranquilidade tanto para o persoal servizo como para os intereses da veciñanza e do Concello”.
Aínda así, este afianzamento legal da municipalización contrasta coas informacións que nos últimos días buscan sementar dúbidas sobre a xestión directa do servizo, chegando incluso a criticar que se aplique correctamente a ordenanza municipal en vigor nada menos que dende o 2012.
O último paso é a filtración hoxe mesmo dun recurso presentado por un avogado a título individual supostamente en “interese exclusivamente cidadán”. O certo é que este recurso xéranos grandes dúbidas, especialmente pola súa opacidade.
Como indicou o alcalde, “teño coincidido como representante público co señor Carlos Abal, en varias ocasións actuando en defensa dos intereses de promotoras que alimentaron a especulación e a burbulla inmobiliaria. No contexto da miña liberdade de expresión, dubido que o interese cidadán sexa o motor deste recurso e gustaríanos saber a quen se está a representar con este tipo de accións xudiciais. As cousas está ben falalas claramente.”
A remunicipalización ORA e do guindastre culminou o pasado 15 de xuño, despois dun duro camiño cheo de obstáculos políticos e administrativos. Dende entón está xestionado directamente pola empresa municipal TUSSA , actualmente en fase de transición con vías a introducir melloras na mobilidade da cidade a partir do outono.
Non somos inxenuos, sabemos que municipalizacións como estas, ou outras realizadas neste mandato como a da asesoría xurídica do Concello, resultan incómodas para moitos axentes económicos e políticos, que ven como unha ameaza o interese de Compostela Aberta por recuperar servizos como o da auga.
Pero ningunha campaña nin ofensiva evitará que sigamos teimando en recuperar aqueles servizos que consideremos viables e beneficiosos para a veciñanza. Sempre con valentía política e sempre con seguridade xurídica, como demostra que o goberno do Estado non presentara recurso e que Setex retirara o seu. Na batalla por recuperar o público non daremos un paso atrás.
