A tenenta de alcaldesa e portavoz de Compostela Aberta salientou hoxe que “os primeiros cen días do mandato servíronnos para asentar as bases do que será a acción de Goberno nos próximos anos, baseada no diálogo e na participación”. María Rozas incidiu en que foron uns meses “moi intensos, nos que tivemos que atender importantes urxencias como a da situación do transporte público, e nos que reconducimos proxectos que viñan de anteriores mandatos e que foran desvirtuados polo Goberno do PSOE, como é o Centro de Atención Integral ás Persoas sen Fogar”.
A tenenta de alcaldesa fixo hoxe un balance positivo dos primeiros cen días do mandato, “nos que mantivemos centos de xuntanzas con colectivos veciñais e entidades de Santiago, recuperando unha aposta polo diálogo e pola participación que se tiña perdido nos últimos anos”. María Rozas tamén destacou a interlocución co persoal dos servizos públicos concesionados, “porque entendemos que esa é a obriga do Goberno local, e que é fundamental para garantir o seu correcto control e funcionamento”. Nese sentido, a concelleira explicou que se tén creado unha comisión de seguimento coas traballadoras do Servizo de Axuda no Fogar, “un dos servizos máis sensibles e nos que queremos garantir unhas mellores condicións para o persoal de cara á próxima licitación que iniciaremos nos próximos meses”; e tamén se mantén unha interlocución permanente cos traballadores e traballadoras dos centros socioculturais e de Tralusa.
Atender urxencias e reconducir proxectos
María Rozas tamén incidiu en que “nestes primeiros cen días centramos moitos esforzos en atender urxencias como as relacionadas con transporte público”. Neste sentido, a tenenta de alcaldesa salientou que “conseguimos substituir doce autobuses da flota que se atopaban en moi mal estado, e sobre os que a empresa concesionaria xa alertara a comezos de ano; e iniciamos tamén os traballos para reiniciar a licitación do servizo de transporte, despois de que o TacGal admitira os recursos contra os anteriores pregos e da publicación do convenio colectivo dos traballadores que supón importantes incrementos salariais”. Relacionado coa mobilidade, a concelleira destacou a convocatoria do Pacto Local pola Mobilidade, que non se reuniu en todo o mandato anterior, e as primeiras medidas para atender o problema da escaseza de taxis en Santiago, como a convocatoria dos exames para outorgar os permisos municipais de conductor.
Da área de Dereitos e Servizos Sociais, María Rozas referiuse á recuperación da filosofía do Centro Integral de Atención ás Persoas sen Fogar, “que vai ter recursos habitacionais tal e como fora concibido orixinalmente e non se limitará a ser un edificio de despachos como pretendía o PSOE”.
