• Compostela Aberta exixe explicacións polos acordos adoptados onte nunha Xunta de Goberno Extraordinaria, da que outra vez non se deu conta publicamente
  • María Rozas advirte que “as últimas decisións de Bugallo demostran a precipitación do Goberno, e exixiremos as responsabilidades políticas e legais que procedan”

María Rozas exixiulle hoxe ao Goberno local “que empece a ser transparente co que está a pasar cos comedores escolares, porque xa non pode esconder a súa nefasta xestión nin atribuirlle os problemas no servizo tan só á suba dos prezos como trata de facer Bugallo”. A concelleira de Compostela Aberta denunciou que “vimos de coñecer que a empresa dos comedores, que en xuño xa anunciou que rexeitaba continuar co servizo, leva sen cobrar cando menos desde febreiro”. Para Rozas, “é evidente que se a inflación lle afecta na súa conta de resultados, máis lle afecta traballar sen que o Concello lle pague o que lle debe”.

María Rozas explicou que onte celebrouse unha Xunta de Goberno extraordinaria na que se aprobou o pago de facturas pendentes a Alimentación Saudable Gallega polo servizo de almorzo e xantar nos comedores escolares correspondentes ao periodo que vai do 1 de febreiro ata o 31 de maio, por un importe total de case 350.000 euros. Como é sabido, o servizo de comedores escolares vén funcionando sen contrato e cunha orde de continuidade desde o pasado mes de xaneiro. A concelleira de Compostela Aberta sinalou que “a precipitación do Goberno de Bugallo é evidente, porque na proposta aprobada faise referencia á contratación dunha auditoría sobre estas facturas con data de 4 de agosto, o mesmo día no que se acorda o seu pago”. “Está claro”, sinalou Rozas, “que Bugallo tiña presa para pagarlle á empresa, para poder exixirlle que continuara prestando o servizo nos primeiros meses do próximo curso”.

Dúbidas legais

A maiores, María Rozas chamou a atención sobre outro acordo adoptado na Xunta de Goberno extraordinaria celebrada onte, para subir os prezos do almorzo e do xantar que se lle pagan a Alimentación Saudable Gallega ata a entrada en vigor do novo contrato que vén de licitarse. A concelleira de Compostela Aberta lembrou que “esta foi unha petición da empresa, que inicialmente o Concello rexeitou porque tal e como se sinalaba nos informes técnicos non era posible alterar os prezos nun servizo que funciona con orde de continuidade”. Rozas mostrou moitas dúbidas sobre a posible irregularidade deste acordo, e exixiulle a Bugallo “que explique con claridade todos estes acordos que se está a adoptar, como se soportan legalmente, e en que medida lle poden afectar ás familias”.

Para María Rozas, “urxe que Rubén Prol e Bugallo asuman responsabilidades, porque o seu mal facer está máis que acreditado”. Neste sentido, lembrou que a empresa comunicou o 21 de xuño que non seguiría prestando o servizo, o Goberno non adoptou ningunha decisión ao respecto ata o 26 de xullo, por mor da presión das ANPAs por non terse aberto ainda o prazo de inscrición nos comedores, cunha orde de continuidade que a prestataria rexeitou por mor da suba dos prezos. A maiores, o 28 de xullo, o Goberno ratificou que non había opción de subir os prezos tal e como reclamaba a empresa, que volveu comunicar o día 29 de xullo que non asumiría o servizo, “e agora atopamos un novo acordo do 4 de agosto polo que finalmente sí haberá esa suba de tarifas rexeitada hai unha semana”. Por iso, incidiu a concelleira de CA, “reclamaremos todas as explicacións e avaliaremos detidamente o acontecido, por se deste proceder se puideran desprender responsabilidades políticas e mesmo xurídicas”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies