Compostela Aberta denunciou hoxe o atraso que acumula o Goberno do PSOE na licitación dos servizos públicos, atraso que non é atribuíble á crise derivada da Covid-19. O grupo municipal de CA lembra que o equipo de Bugallo tivo case un ano para iniciar os procedementos de adxudicación de importantes contratos que remataban en abril, e para os que optou por aprobar ordes de continuidade, como son os da recollida do lixo e o mantemento de parques e xardíns. Tamén funciona baixo orde de continuidade o servizo de transporte urbano.
Despois de que a Xunta de Goberno aprobara hoxe a orde de continuidade do contrato con Cespa para o mantemento dos parques e xardíns, Compostela Aberta lembra que o PSOE era sabedor desde a súa chegada ao Goberno da imposibilidade de prorrogar este contrato a partir do mes de abril. Nese sentido, a concelleira responsable do departamento, Mila Castro, pronunciouse en repetidas ocasións nos medios de comunicación, comprometéndose a ter licitado o servizo durante a primavera de 2020. Mesmo en novembro pasado adiantou nun xornal algúns detalles dos pregos para a licitación, que xusto medio ano despois ainda non foron aprobados.
Do mesmo xeito, a concelleira imcumpriu o seu compromiso de ter adxudicado o novo contrato da recollida do lixo na primavera, e este servizo funciona a día de hoxe cunha orde de continuidade a Urbaser aprobada tamén durante estado de alarma. Neste caso, Compostela Aberta lembra que no pasado mandato quedaran elaborados os pregos para iniciar a licitación do servizo, e mesmo se abrira unha consulta ao mercado. No que respecta ao departamento que dirixe Mila Castro, tampouco foron licitados os contratos de alumeado e do servizo de abastecemento de auga,
Ademais, o Goberno do PSOE non conseguiu iniciar a licitación do servizo de transporte urbano. Neste caso, Compostela Aberta tamén deixara elaborados os pregos no pasado mandato, tamén cunha orde de continuidade a día de hoxe.
Para Compostela Aberta é significativo que o PSOE de Bugallo non fora quen de iniciar ningunha das licitacións de servizos pendentes no ano que leva no Goberno, e manteña a súa prestación a través de ordes de continuidade, unha figura legal que foi reiteradamente cuestionada polo grupo socialista durante o pasado mandato.