- Xan Duro é o novo concelleiro de Mobilidade, Convivencia e Centros Socioculturais
María Rozas é a nova concelleira de Dereitos e Servizos Sociais, Promoción Económica e Xuventude, ademais de primeira tenenta de alcaldesa; e Xan Duro asume as competencias de Mobilidade, Convivencia e Centros Socioculturais no Goberno de coalición presidido por Goretti Sanmartín. Anunciárono hoxe en rolda de prensa a portavoz de Compostela Aberta e a nova alcaldesa, que reiteraron a vontade compartida de CA e BNG para impulsar políticas progresistas e transformadoras en Santiago durante os próximos catro anos.
Tal e como se recolle no decreto asinado pola alcaldesa, María Rozas terá delegadas as competencias de Promoción Económica, Comercio, Emprego, Políticas Sociais, Diversidade, Economía Social, Maiores, Saúde, Unidade de Atención ás Migracións, Cooperación ao Desenvolvemento, Xuventude e Orzamentos Participativos. Pola súa banda, Xan Duro asume as competencias de Mobilidade, incluidos os servizos da ORA e o guindastre e a xestión de TUSSA; Policía Local, Protección Civil, Servizo de Extinción de Incendios e Emerxencias, Mercados, e Centros Socioculturais. Tanto María Rozas como Xan Duro fan parte tamén da Xunta de Goberno local, que hoxe celebrou a súa primeira reunión neste novo mandato.
María Rozas recoñeceu a satisfacción de Compostela Aberta co reparto de áreas, “que é o mellor para o bo funcionamento do goberno, e tamén acaído para os perfís dos concelleiros e concelleiras, en particular para os de CA que temos experiencia nas áreas que asumimos”. Así, a portavoz municipal incidiu en que “Xan Duro terá responsabilidades en materia de Mobilidade, que entendemos que é un dos principais retos que ten por diante Santiago, con cuestións que requerirán unha resposta urxente como o do novo transporte urbano”. O edil tamén se encargará dos Centros Socioculturais, “un departamento que CA considera moi importante, moi apegado ao territorio, e que temos vontade de reimpulsar para aproveitar o potencial destes equipamentos”. En canto ás súas competencias, María Rozas explicou que é a súa intención “avanzar nas Políticas Sociais, de maneira coordinada cos departamentos de Promoción Económica e Emprego”. A tenenta de alcaldesa reiterou que “Compostela Aberta traballará a reo no novo Goberno, coa alcaldesa Goretti Sanmartín, para impulsar políticas transformadoras en Santiago e para afrontar con rapidez e valentía os retos que tén por diante Compostela”.
