- Unanimidade da Corporación para conmemorar o bicentenario do nacemento de Concepción Arenal
O PSOE impediu onte, cos seus votos en contra, a aprobación dunha proposición de Compostela Aberta para a creación dunha Renda de Garantía Infantil, que promovera a igualdade de oportunidades entre todos os nenos e nenas e asegurara un ingreso mínimo por fillo ou filla ás familias con escasos recursos. A concelleira responsable de Politícas Sociais, Milagros Castro, xustificou a súa oposición á este instrumento sinalando que “non teño a seguridade de para onde irían os recursos dos máis novos cunha Renda Infantil, e eu quero garantir que as axudas vaian destinadas aos fins para os que son concedidas”.
Compostela Aberta presentara unha proposición para instar ao Goberno a impulsar unha Renda de Garantía Infantil “unha proposta que permitiría que Santiago siga sendo pioneiro no relativo ás políticas sociais, despois de ter desenvolvido durante o pasado mandato unha Ordenanza de Garantía Básica que chega a a 350 familias”. A concelleira Marta Lois incidiu en que “a Renda Infantil estaría enmarcada nesa ordenanza, e transformaría e simplificaría os trámites das actuais bolsas de comedor, material ou actividades extraescolares, que multiplicaron por sete o seu orzamento durante o Goberno de CA”. Na súa resposta, a concelleira de Políticas Sociais argumentou que “os nenos e nenas de Santiago xa son beneficiarios das axudas económicas que perciben os seus proxenitores, sexan de competencia municipal ou autonómica”. Milagros Castro sinalou que “debemos artellar os recursos que garantan a cobertura das necesidades básicas dos máis novos, pero nós queremos que os recursos que lles damos aos máis novos vaian adicados a ese fin, e eu non teño a seguridade de para onde van os recursos dos máis novos, se promovemos unha Renda”.
Aprobada a moción de CA sobre o río Sar
No Pleno de onte quedou aprobada a moción presentada por Compostela Aberta para instar ao Goberno a adoptar unha batería de medidas para a recuperación ambiental do río Sar, parcialmente emendada polo PP. Na proposta, o grupo municipal de Ca recollía unha serie de demandas da Plataforma pola Recuperación do río Sar, que estivo representada na sesión por Antón Bouzas. O texto, defendido por Jorge Duarte, pídelle ao Goberno que reclame a participación dun técnico municipal na comisión que avalía as ofertas para a futura EDAR da Silvouta, “para garantir que temos o mellor proxecto, despois que durante o pasado mandato conseguiramos mudar a localización do Souto para salvagardar este espazo natural”. A moción tamén recolle a necesidade de investigar e sancionar as verteduras que se veñen producindo no río Sar, de realizar obras das acometidas de augas residuais de vivendas que verten directamente ao río na Travesía da Fervenza e en Poza Real en Conxo; ou que se solicite a protección hidrolóxico-forestal das cuncas hidrográficas do Sar.
Licitación do transporte urbano
Pola contra, o PSOE impediu a aprobación dunha moción na que Compostela Aberta pedía a convocatoria da comisión de seguimento do Pacto pola Mobilidade, para coñecer os plans do Goberno local en relación á licitación do servizo de transporte urbano. O concelleiro Jorge Duarte lembrou que “no anterior mandato quedaron os pregos definidos, cun mapa de rutas acordado coa veciñanza que garantía o servizo a zonas que históricamente tiveron un transporte urbano deficitario”. Nesa liña pronunciouse no Pleno Martín Rozas, que interviu en nome do movemento asociativo de Angrois, O Viso e Sara para apoiar a moción de CA, e pedirlle ao Goberno do PSOE que manteña o deseño das rutas alcanzado durante o pasado mandato.
Outras propostas de CA
No Pleno de onte tamén foi aprobada, por unanimidade, a moción de Compostela Aberta para a celebración do bicentenario do nacemento de Concepción Arenal. Na proposta fálase de deseñar unha programación específica para divulgar a figura e a obra da escritora, penalista e feminista; así como de encargar unha escultura que lle renda homenaxe.
Por último, quedou rexeitada a moción na que CA propoñía medidas para fomentar o retorno do talento da nova diáspora galega, por mor dos votos en contra do PSOE.
PODES CONSULTAR AQUÍ UN RESUMO DO ACONTECIDO NO PLENO ORDINARIO DE NOVEMBRO