- Compostela Aberta lamenta que o Goberno local non dera os pasos necesarios para impulsar o estacionamento, nin na parcela ao carón do CIMUS nin no SUD 9-10
Compostela Aberta levará ao próximo Pleno unha moción de urxencia para esixir solucións aos problemas de aparcamento no Hospital Clínico, “porque comprobamos que ainda que o alcalde por fin asume que debe esixirlle á Xunta a construción dun novo estacionamento, non está a dar os pasos que lle corresponden para conseguir ese equipamento”. Explicouno o concelleiro Jorge Duarte, que lamentou que o Goberno leve a Pleno a modificación puntual do PXOM no ámbito do SUD 9-10 en Chouchiños “sen ter en conta o acordado xa en decembro de 2021 para aumentar as parcelas dotacionais da área, co obxectivo de mellorar a accesiilidade e mobilidade no contorno do CHUS”. Ademais, reiterou o edil, “tampouco consta que Bugallo lle ofrecera á Xunta a parcela situada ao carón do CIMUS, na que xa no pasado mandato quedou planficado o que debera ser o novo parking do Clínico”.
Jorge Duarte mostrou a súa satisfacción porque o alcalde “por fin caera da burra, e diga agora que na súa reunión con Alfonso Rueda reclamará a construción do aparcamento do Clínico, despois de moitos meses afirmando que había que elixir entre ter máis quirófanos e ter estacionamento”. Para o concelleiro de Compostela Aberta, “este recoñecemento debe vir acompañado dun traballo por parte do Goberno local que a día de hoxe seguimos sen percibir”. Nese sentido, explicou que na comisión de Urbanismo celebrada a semana pasada o Goberno presentou a súa proposta para a aprobación provisional da modificación puntual do PXOM do ámbito do SUD 9-10, sen incluir a emenda ao respecto que fora aprobada polo Pleno en decembro de 2021, e que facía referencia á necesidade de “darlle maior superficie ás parcelas dotacionais previstas que permitan a ampliación do Complexo Hospitalario, resolver mellor os graves problemas de mobilidade e de estacionamento e facer viable o desenvolvemento do planeamento”. Unha vez que non se atendeu nesta demanda, Jorge Duarte urxiu ao Goberno “a iniciar a tramitación dunha nova modificación puntual do PXOM, atendendo as necesidade existentes, e tamén as propias indicacións do persoal técnico municipal”.
Parcela próxima ao CIMUS
O edil de Compostela Aberta incidiu en que “a primeira opción que Bugallo debe formularlle a Rueda é a mesma que reiteradamente lle esixiu o anterior alcalde, Martiño Noriega, a Feijóo: a parcela situada ao carón do CIMUS, para a que no pasado mandato se elaborou xa un estudo de detalle que prevía a construción dun aparcamento en tres plantas”. Duarte insistiu en que o alcalde debe retomar este proxecto, “e esquecer as escusas que leva poñendo máis dun ano, desde a aprobación do anteproxecto para a ampliación do hospital”.
Coa moción de urxencia que levará ao próximo Pleno, Compostela Aberta quere que o conxunto da Corporación “inste á Xunta a prever a construción deste aparcamento, e a incluir este necesario equipamento nos orzamentos autonómicos para 2023, porque Santiago debe recibir o mesmo trato que outras cidades nas que o Goberno galego sí vai construir os estacionamentos vinculados ás áreas hospitalarias”. Duarte mostrou o seu desexo de que “desta vez sí haxa unanimidade con respecto a esta posición, porque lamentablemente o PSOE chegou a absterse no pasado mandato, nunha moción na que CA tamén lle reclamaba á Xunta dotación orzamentaria para o aparcamento do Clínico”.
PODES CONSULTAR AQUÍ A MOCIÓN DE URXENCIA DO GRUPO MUNICIPAL DE COMPOSTELA ABERTA SOBRE A NECESARIA CONSTRUCIÓN DUN APARCAMENTO PÚBLICO PARA DARLLE SERVIZO AO COMPLEXO HOSPITALARIO UNIVERSITARIO DE SANTIAGO