Quen Somos

Compostela Aberta é unha proposta colectiva da cidadanía de Santiago Compostela, un proceso político-social de confluencia de persoas conscientes e comprometidas para devolverlle a cidade á xente. Somos un grupo integrador e democrático. Todas as decisións que tomamos se debaten e votan en asembleas públicas e abertas, ás que poden asistir todas as persoas que o desexen, sexan ou non membros de Compostela Aberta.

Compostela Aberta creouse pouco antes das eleccións de maio de 2015, co obxectivo de, tal e como expresamos no noso Manifesto, rematar coa corrupción, gobernar democraticamente para as persoas e configurar a Compostela do século XXI. Unha morea de voluntarias e voluntarias, expertos nas súas respectivas materias, elaboraron un código ético e un programa baseado no documento que denominamos As 13 chaves , no que se definen as liñas programáticas e de transparencia de Compostela Aberta.

En maio de 2015 Compostela Aberta gaña as eleccións municipais. Obtivo a maioría simple, un 34,58 % dos votos emitidos (16.327), cos que acadou dez concellarías. A partir de aí o obxectivo é aplicar dun xeito transparente e democrático o programa electoral. Con esta finalidade impúlsanse os Grupos de Traballo (GdT) que, baseándose nos distintos documentos programáticos e éticos elaborados, apoian e complementan a actividade do goberno. A interlocución dos GdT co equipo de goberno establécese a través da Comisión Coordinadora, na que están presentes os portavoces dos grupos e membros do executivo municipal.