Noriega explicou durante a súa quenda que “CA recuperou durante este mandato a Compostela que latexa cultura, unha cidade que ten unha banda sonora propia tras un mandato do Partido Popular onde se apostou polo silencio e o desprezo”. Por iso avanzou que “se logramos a confianza da veciñanza seguiremos na senda que comezamos a construír estes catro anos, con políticas culturais activas que sexan exemplo en todo o país e que merecen afianzarse no tempo”.
O alcalde e candidato propuxo “seguir reforzando propostas consolidadas como Cineuropa ou Curtocircuíto, dentro desa Compostela de cine que comezamos a impulsar ante a UNESCO durante este mandato”. Xunto a iso prometeu seguir apoiando festivais como o WOS ou organizando actividades como a SELIC. “Foron moitas as iniciativas pioneiras en materia cultural que cómpre fortalecer outros catro anos, dándolle así sentido ao relato cultural que temos para este concello”.
Ademais, entre as propostas novidosas destaca a creación dun bono cultural e unha axenda cultural única que permita acumular descontos ou beneficios xustificando o consumo de cultura na cidade.
Tamén asinaremos a Carta da Igualdade Muller-Home nas Artes Escénicas, que garantirá unha participación femenina paritaria na producción e programación municipal, “dando así continuidade ao proxecto europeo Wom@rts co que visibilizamos ás mulleres nas artes”.
Dación de contas
Nestes catro anos iniciamos a transformación dun modelo de xestión que buscou incrementar a participación da veciñanza, descentralizar e diversificar actividades e transformar as políticas anteriores, volvendo encher as rúas, os teatros e os auditorios de actividades e de cultura. Compostela convertiuse así na cidade do cinema, na cidade da literatura e na cidade da música.
Na cidade do cinema, mellorando e reforzando propostas herdadas como o Curtocircuíto ou Cineuropa, e incluíndo a solicitude de adhesión á Rede de Cidades Creativas da UNESCO na categoría de Cine.
Na cidade da literatura, impulsando un novo modelo de promoción cultural a través da SELIC (Semana do Libro de Compostela), que gozou de moi boa acollida e ten xa un peso específico en Santiago ou o proxecto do Xardín das Palabras, polo que pasan numerosos premios literarios.
Na cidade da música, converténdoa na protagonista das festas, descentralizándoas, apostando polos grupos locais no escenario ‘Compostela (É) Música’, cun modelo de concertos de balde que se completou cos grandes concertos no Multiusos Fontes do Sar, ou impulsando unha ordenanza pioneira que aposta pola música ao vivo nos locais “volvendo encher de son a nosa cidade”.
Todo isto complétase coa captación de fondos europeos a través do programa Wom@rts, coa celebración da Festa do Banquete de Conxo como exercicio de valorización da memoria cívica, coa extensa programación cultural e expositiva do Auditorio de Galicia e coas convocatorias abertas, tanto para compañías de teatro na Sala Agustín Magán como coa creación dunha liña de subvencións por concorrencia competitiva no eido cultural, dotada con 150.000 euros.