A coordinadora de Compostela Aberta fai a seguinte valoración das Eleccións Galegas do 25S:
1) Valoración global. O obxectivo de cambiar o goberno e as políticas do PP non foi acadado, o que constitúe unha oportunidade perdida para o conxunto da esquerda, pois significa a continuidade dos recortes nos servizos públicos e da corrupción.
2) Valoración EnMarea. Con 273.000 votos e 14 escanos, EnMarea convértese na primeira forza da oposición a Feijoo. Valoramos positivamente a construción dunha nova alternativa de esquerdas que se demandaba desde a cidadanía e o municipalismo do cambio. Valórase tamén a emerxencia do liderado de Luís Villares, en sintonía coas demandas dunha política que poña en primeiro lugar as necesidades das persoas. En Marea constitúe unha ferramenta, aínda en construción, para desbancar as políticas neoliberais.
3) Valoración dos resultados en Santiago de Compostela. Aínda que cómpre ter en conta que as eleccións xerais, autonómicas e municipais son diferentes, os resultados na cidade constitúen un toque de atención, e apuntan á necesidade de facer que se visualice o traballo realizado desde o 24 de maio. Estes resultados tamén son unha mostra do cansazo experimentado pola cidadanía pola reiteración de eleccións. Cremos que é preciso traballar a prol da recuperación da ilusión polo traballo constante na rúa.
