Desta maneira, e despois dunha sentenza do Tribunal Superior de Xustiza de Galicia, pónselle fin aos litixios xudiciais que acompañaron o proceso, litixios impulsados pola empresa que xestionaba eses servizos en función dunha adxudicación que fora anulada xudicialmente en 2015, tamén polo propio TSXG. Para o edil de Compostela Aberta, “queda claro que as cousas se fixeron ben, e que ainda que os agoreiros falaban de custos millonarios para o Concello, eses custos serán, como nós diciamos, para a empresa”.
O concelleiro de Mobilidade compareceu en rolda de prensa para explicar a resolución da que se deu conta na Xunta de Goberno desta mañá. Xan Duro recoñeceu a súa satisfacción por poder asinar este decreto “como membro do actual Goberno, e sobre todo como concelleiro de Compostela Aberta que fixo parte do Goberno que afrontou a municipalización da ORA e do guindastre no medio de grandes críticas de parte da oposición, que cifraba en ata dous millóns e medio de euros os custos do proceso para o Concello”. O edil de CA lembrou que, ao longo destes seis anos, “a xustiza demostrou o contrario, confirmando primeiro que o Concello non tiña que pagarlle a Setex o millón de euros que reclamaba polos parquímetros, e ratificando agora o TSXG que a empresa debe abonar tamén 716.000 euros pola liquidación do contrato, unha cifra moi similar á que establecera o Goberno en 2018”.
Xan Duro lembrou que “ao longo destes seis anos foron moitas as ocasións nas que se falou da municipalización da ORA e o guindastre como unha operación ruinosa para o Concello de Santiago. Compostela Aberta sabía que fixera as cousas ben, e hoxe queda demostrado que así foi”.
