- Compostela Aberta denuncia que o proxecto non sería posible se o Goberno de Bugallo tivera tramitado a declaración de ENIL para esta área, tal e como lle encomendou o Pleno hai tres anos
- CA reclamará no Pleno que o Concello inicie o procedemento para a declaración do Souto como Espazo Natural de Interese Local e que se posicione en contra do proxecto que se atopa en exposición pública
Compostela Aberta quere que o Concello lle reclame á Xunta o redeseño do trazado da liña aérea de alta tensión que vai de Mazaricos a Santiago, no tramo que lle afecta ao espazo natural do Souto. Así se recolle nunha proposición que Xan Duro defenderá no próximo Pleno. O concelleiro de CA tamén reclama que o Goberno local inicie o procedemento para a declaración do Souto como Espazo Natural de Interese Local, tal e como o Pleno xa acordara en xullo de 2019. Duro incidiu en que “de terse realizado estre trámite, o Souto non estaría agora ameazado por un proxecto que supón unha enorme agresión para unha zona dunha gran riqueza natural e patrimonial”.
O Diario Oficial de Galicia publicou o pasado 22 de agosto o proxecto da liña de alta tensión que conectará os parques eólicos da Picota, en Mazaricos, con Santiago. Polo termo municipal de Compostela discorrerán preto de catro quilómetros desta liña, dos que 2,2 serán de trazado aéreo, e 1,4 de liña soterrada. Parte do trazado aéreo aféctalle ao lugar do Souto, onde o proxecto prevé a instalación de sete apoios para o cableado, con catro cimentacións de formigón cada un deles e con alturas por riba dos 20 metros. Dous deles, ademais, afectanlle directamente ás masas de árbores caducifolias autóctonas e ao xacemento da Silvouta.
Xan Duro cualificou o proxecto da liña de alta tensión como “un auténtico despropósito que o Concello de Santiago non pode permitir, e por iso urximos ao Goberno, e nomeadamente ao alcalde, a reclamar de maneira inmediata o redeseño do trazado”. O concelleiro de Compostela Aberta incidiu en que “é posible diminuir o impacto da liña, cun proxecto que contemple o seu soterramento en paralelo á autovía AG-56, evitando o que sería unha agresión irreversible a un espazo cun enorme valor patrimonial, arqueolóxico e etnográfico ademais de ambiental”. Duro lembrou que no Souto concéntranse especies autóctonas como carballo, loureiro e freixo; fauna protexida polas directivas europeas como a papuxa do mato, a lontra e o caracol de Quimper; e importante patrimonio etnográfico como o petróglifo do Souto, os restos da fábrica de papel do Pego, ou Castro de Quistiláns ou o xacemento da Silvouta. O edil incidiu en que “é incomprensible que a Xunta viabilice un proxecto que tería gran afectación sobre especies protexidas e sobre elementos patrimoniais catalogados pola propia Xunta”.
Atraso na tramitación do ENIL
Xan Duro insistiu en que “esta nova ameaza ao Souto teríase evitado se o Goberno local fixera os deberes e tramitara a declaración do Souto como Espazo Natural de Interese Local, tal e como o Pleno lle encomendou en xullo de 2019 a partir dunha proposta de Compostela Aberta”. Agora, lamentou, “temos sobre a mesa un proxecto que, de viabilizarse, probablemente dificultará que o Souto acade a consideración de ENIL no futuro e, polo tanto, unha especial protección dos seus valores naturais”.
O concelleiro de CA denunciou que “tres anos despois de que o Pleno lle encomendara ao Goberno iniciar a tramitación da ENIL e a elaboración dun plan de conservación do Souto, nada sabemos dos pasos que deu o Concello, máis alá dunhas conversas que a concelleira Mila Castro asegurou manter coa Dirección Xeral de Patrimonio Natural en setembro de 2020”. Xan Duro reclamou explicacións sobre o traballo feito ata agora para conseguir que o Souto sexa cualificado como Espazo Natural de Interese Local, e reclamoulle ao Goberno “que retome estas xestións con carácter urxente”.
PODES CONSULTAR AQUÍ A PROPOSICIÓN DO GRUPO MUNICIPAL DE COMPOSTELA ABERTA PARA O REDESEÑO DA FUTURA LIÑA DE ALTA TENSIÓN AO SEU PASO POLO SOUTO E PARA A DECLARACIÓN DESTE ESPAZO COMO ENIL