• Compostela Aberta e BNG acompañaron ao persoal de Urbaser no servizo nocturno do venres, e comprobaron in situ as deficiencias do servizo
  • Un só varredor para o Ensanche e a zona histórica, cando debía haber cinco, demostra o incumprimento do contrato en canto a medios humanos

O concelleiro de Compostela Aberta Xan Duro exixiulle hoxe ao Goberno local “que deixe de mirar para outro lado e de atender a intereses que nada teñen que ver cos da veciñanza, e empece a inspeccionar e garantir o correcto funcionamento do servizo de recollida do lixo e limpeza viaria”. O edil, que na noite do venres acompañou ao persoal de Urbaser na súa quenda de traballo, reiterou que “é máis que evidente que non se está cumprindo o actual contrato en canto á dotación de medios materiais e humanos, e iso ten consecuencias para os propios traballadores e os seus dereitos, pero tamén para a veciñanza”. O mellor exemplo, sinalou, “é que nese turno había un único varredor facendo o traballo que na oferta de Urbaser se estima para cinco persoas”.

O comité de empresa de Urbaser convidou aos grupos da oposición a acompañar aos traballadores no turno da noite de venres, para comprobar de primeira man as moitas deficiencias que se están a producir na prestación do servizo. Xan Duro explicou que “puidemos ver como todo o traballo de barrido das rúas da zona vella e do Ensanche recaeu nesa noite nun único traballador, por mor das baixas sen cubrir doutro persoal, e non hai que explicar que é imposible que unha soa persoa atenda correctamente unha función que lle corresponde a cinco empregados, tal e como se especifica na oferta técnica pola que Urbaser gañou a licitación do servizo”. O edil incidiu en que “no que tén que ver co persoal, non hai ningunha escusa para non cumprir o prego, e o Goberno é responsable de non facer un control estrito do que está a pasar no servizo”. Xan Duro lamentou, ademais, “a lentitude coa que se están implementando as melloras previstas no contrato en canto a medios materiais, porque no percorrido comprobamos como se manteñen moitos contedores vellos e en mal estado, illas soterradas que non funcionan, e camións con múltiples deficiencias”. 

No Pleno do próximo día 15 debateráse unha moción conxunta presentada por Compostela Aberta, BNG e PP para reclamarle ao Goberno ue adopte as medidas necesarias para garantir o cumprimento das condicións establecidas no novo contrato da recollida do lixo e limpeza viaria, así como do convenio que lle afecta ao persoal. Xan Duro lembrou que “os traballadores e traballadoras levan meses denunciando a súa situación, que tén derivado na convocatoria dunha folga diante da pasividade do Goberno e, nomeadamente, do alcalde e da concelleira de Medio Ambiente”. Para o concelleiro de CA, “é urxente que Bugallo e Mila Castro se poñan a traballar, avalíen o funcionamento dun servizo municpal especialmente sensible para a veciñanza e medien entre a empresa e os traballadores”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies