- CA pedirá no Pleno que se garanta o convenio propio dos CSCs unha vez entren en vigor os novos contratos coas empresas adxudicatarias do servizo
- Marta Lois lamenta a falta de diálogo do alcalde e do concelleiro “que non está á altura das súas responsabilidades, nin nos centros nin nas obras”
Compostela Aberta reclámalle ao Goberno local que atenda as demandas do persoal da rede de Centros Socioculturais e que traballe para garantir, coa entrada en vigor dos novos contratos de xestión, se manteña o seu convenio propio e non existan dobres escalas salariais entre as traballadoras. A portavoz municipal, Marta Lois, lembrou que “o persoal leva mantendo xornadas de folga desde o pasado mes de abril, diante da pasividade do alcalde e do concelleiro responsable, que nin sequera manteñen un diálogo minimamente fluído coa representación do persoal”. Para a concelleira de CA, “cada día que pasa, hai máis motivos para pedir a dimisión de Javier Fernández, que non está á altura das súas responsabilidades nin no departamento de Obras nin tampouco no de Centros”.
O próximo 1 de xullo entrarán en vigor os novos contratos de xestión da rede de Centros Socioculturais, en tres dos catro lotes nos que foi dividida esa adxudicación: animación sociocultural, bibliotecas e atención ao público. O cuarto lote, o de nova tecnoloxías, atópase novamente en licitación, tras quedar deserto o primeiro procedemento. Marta Lois lembrou que “estes novos contratos chegan precedidos por numerosas queixas, tanto do propio persoal como dos grupos da oposición, que levamos meses denunciando os moitos erros e anomalías que presentaban os pregos aprobados polo Goberno”. “Moitos deles”, sinalou, “aféctalle ás condicións laborais, e por iso a representación das traballadoras vén reclamando xuntanzas, sistematicamente rexeitadas polo Goberno, que só tivo a ben recibir ao comité de empresa nunha ocasión, o pasado 30 de maio, e cando o persoal xa levaba un mes cunha folga intermitente que aínda non rematou”.
Dous meses de folga
A portavoz de CA lembrou que esta folga, que xa se prolonga por dous meses, “é a primeira que se produce nos servizos municipais desde hai máis de once anos, está a ter un importante seguimento, e o concelleiro non pode seguila obviando”. Cos paros, os traballadores dos CSC mostran a súa preocupación polo futuro dos traballadores do servizo de informática, o lote que quedou deserto, e por como pode afectar ao persoal en activo a entrada dun centro especial de emprego noutro dos lotes; e reclaman que as novas empresas adxudicatarias respecten o convenio propio da rede. Para Marta Lois, “estas son cuestións polas que debe interesarse o Goberno, que non pode escudarse nas relacións laborais entre as empresas e os traballadores cando estamos a falar dun servizo municipal no que non pode continuar o actual conflito laboral que dificulta o correcto funcionamento da rede”.
Marta Lois lembrou que “o persoal dos CSCs maniféstase cada semana ás portas do Pazo de Raxoi, e o alcalde e o concelleiro de Centros non poden seguir ignorando a situación”. “A súa actitude”, concluiu a portavoz de Compostela Aberta, “non fai máis que darlles a razón ás traballadoras que cada vez con máis forza reclaman a dimisión de Javier Fernández, porque está acreditado que non está á altura do seu cargo”.
PODES CONSULTAR AQUÍ O ROGO DO GRUPO MUNICIPAL DE COMPOSTELA ABERTA PARA QUE O CONCELLO ATENDA AS DEMANDAS DAS E DOS TRABALLADORES DO SERVIZO MUNICIPAL DE CENTROS SOCIOCULTURAIS EN FOLGA
