- Jorge Duarte e Branca Novoneyra participaron na concentración convocada pola veciñanza
Compostela Aberta manifestou hoxe o seu apoio á Plataforma de Afectados polo vertedoiro de Miramontes, e lamentou que “a veciñanza teña que convocar unha concentración porque ningunha administración está facendo cumprir, 70 días despois, a sentenza firme do Tribunal Supremo que prohibe o paso de vehículos pesados pola pista rural que lle da acceso á canteira”. A portavoz municipal de CA urxiu ao alcalde “a non escudarse en cuestións competenciais, porque a súa obriga como representante da cidadanía de Santiago é defender os seus intereses diante de todas as administracións, nomeadamente da Xunta de Galicia”.
Marta Lois considerou “incomprensible” que pola pista de acceso ao vertedoiro de Miramontes sigan circulando vehículos de gran tonelaxe, aínda despois das diferentes sentenzas xudiciais que avalaron a prohibición ditada polo Goberno local durante o mandato de Compostela Aberta. Para a portavoz municipal, “desde que o Supremo se pronunciou ao respecto, hai xa 70 días, non quedan escusas para non actuar con contundencia e impedir o paso destes camións que non teñen autorización, e que se ampararon durante tres anos e medio en que o procedemento xudicial non estaba pechado para seguir transitando pola Grixoa”. A concelleira lamentou a actitude do alcalde “que hoxe mesmo volve falar de cuestións competenciais que á veciñanza pouco lle importan, no canto de exercer a súa responsabilidade e abordar a problemática de Miramontes coas administracións correspondentes”. Neste sentido, instou a Bugallo a “reclamarlle á Delegación do Goberno que actúe para impedir a circulación de camións, pero sobre todo, a esixirlle á Xunta de Galicia que adopte medidas para pechar o vertedoiro e acabar cunha actividade insalubre como a que nel se desenvolve”.
Na concentración convocada pola Plataforma de Afectados polo vertedoiro de Miramontes participaron este mediodía os concelleiros de Compostela Aberta Branca Novoneyra e Jorge Duarte, que trasladaron á veciñanza o apoio do grupo municipal a todas as súas reivindicacións.
