Temos un soño común. O de transformar a vida das nosas cidades. Somos conscientes de que existen intereses moi poderosos no noso país que pretenden limitar o alcance da nosa aposta, por iso debemos traballar arreo para chegar fortes a 2019, sumando esforzos a prol do ben común.
Para iso asistimos ao primeiro encontro en Ourense. Porque estamos convencidos que para transformar o local temos que espallar a nosa vontade de cambio político. Esa é a nosa aposta, cimentar unha alternativa transformadora, participada pola cidadanía, que afonde na radicalización da democracia e que impugne o marco de desigualdade que padecemos.
Durante a mañá, seguiremos traballando en diferentes Grupos de Traballo: repetiremos as mesmas temáticas que en Ourense (organización, institucional e participación), xunto con outro a maiores, centrado nas problemáticas da contorna de Santiago de Compostela. Pola tarde, teremos unha mesa na que sentaremos as prioridades políticas do horizonte 2019, no que falaremos das medidas que xa estamos a levar a cabo dende os gobernos e as liñas de oposición ás políticas do Partido Popular. Podes consultar aqui o programa completo https://compostelaaberta.org/HaiMareas20X-Programa/
A sesión de tarde será retransmitida en streaming na canle de youtube de Compostela Aberta https://www.youtube.com/channel/UCw-wUvR-RQ5P_5Cerya7-Ag/live e poderá facerse seguimento do evento na canle de telegram do encontro https://t.me/HM20X
Participa nesta xornada o sábado 20 de xaneiro en Compostela. Para construírmos en común. Para soñar en común. O 20 de xaneiro #HaiMareas #HaiMareas20X
?? Nota: durante a xornada haberá espazo de atención infantil para nenas e nenos de 3 a 10 anos.
