Un ano máis, a clase traballadora saíu ás rúas e prazas da cidade en defensa da fraternidade, do benestar e da Xustiza Social. Como lugar de encontro, Compostela Aberta tivo neste 1º de maio representación en todas as manifestacións sindicais da cidade, reivindicando a loita contra a precariedade, a explotación laboral, a fenda de xénero ou as pensións de miseria.
Nesa loita pola mellora do emprego e do benestar, Compostela mellorou todos os indicadores laborais nos últimos catro anos. Poboación ocupada, contratación indefinida, afiliación á seguridade social… Todos estes indicadores están mellor hoxe que no 2015 e no 2011, malia os discursos catastrofistas dos partidos da oposición e dos poderes fácticos e mediáticos que os apoian.
Pero non abonda e queda moito por facer e máis nun contexto onde a ultradereita rexorde cun discurso que vai máis alá incluso das políticas de recortes e sufrimento do Partido Popular. Por iso seguiremos loitando por un Concello que sirva de ferramenta para a recuperación de dereitos e contra a precariedade.
Un Concello máis social que siga colocando o emprego de calidade e o talento no centro da axenda política, que axude ao tecido cooperativo, que impulse axudas sociais e de conciliación na contratación pública, que teña tolerancia cero contra a corrupción, que acompañe nas reivindicacións xustas das traballadoras tanto municipais como das concesionarias e que a administración pública sexa un exemplo e punta de lanza nos avances e nas conquistas laborais.
Por iso temos un enorme reto por diante para que Compostela siga avanzando e conquistando máis futuro para a cidade. Porque as liberdades e os dereitos sociais teñen quen os defendan.
