Compostela Aberta denunciou a campaña “que se fai coincidir en periodo electoral para informar das supostas melloras dun contrato que leva un ano en funcionamento”
A Xunta Electoral de Zona vén de darlle a razón a Compostela Aberta, que denunciara ante este órgano o envío de cartas aos domicilios particulares de Santiago co lema “Santiago Sostible”. Trátase de misivas asinadas polo alcalde, e candidato do PSOE, nas que se daba conta das “moitas melloras levadas a cabo polo Concello” no servizo de recollida do lixo. A Xunta Electoral ordena a suspensión desta campaña, e advirte da apertura dun expediente sancionador no caso de que non sexa paralizada.
Nas últimas semanas, foron moitos os domicilios particulares que recibiron unha carta asinada por Bugallo, na que se combinaba a imaxe institucional do Concello de Santiago co logo de Urbaser, e na que se falaba do novo contrato do servizo do lixo. Compostela Aberta denunciou esta campaña por entender que o seu contido non tén relación con mensaxes imprescindibles para asegurar o correcto funcionamento do servizo, senón que a súa finalidade é outra. Nese sentido, CA incidía en que a campaña fíxose coincidir co periodo electoral, cando o contrato leva máis dun ano en vigor, e en que a única información incluída era un teléfono de atención que tamén leva un ano en funcionamento. A Xunta Electoral de Zona dálle a razón a Compostela Aberta, posto que as instrucións do órgano prohiben expresamente en periodo electoral “calquera acto organizado ou financiado, directa ou indirectamente, polos poderes públicos, que conteña alusións ás realizacións ou logors obtidos, agás os que resulten imprescindibles para o funcionamento do servizo”.
Na notificación que foi remitida onte a Compostela Aberta, a Xunta Electoral de Zona informa de que desestimou as alegacións presentadas polo PSOE e que ordena a paralización da campaña. Para Xan Duro, “a decisión da Xunta Electoral deixa máis en evidencia o que xa era evidente: o uso electoralista que fai Bugallo da institución municipal, que mesmo foi denunciado a través das redes sociais por veciños e veciñas que recibiron esta carta”. O responsable de CA considerou que “o PSOE mesmo comete unha torpeza ao falar dos seus grandes logros nun servizo que está a suscitar moitas queixas, da cidadanía pero sobre todo do persoal da concesionaria que leva semanas denunciando o incumprimento das súas condicións laborais”.
Xan Duro informou, ademais, de que a Xunta Electoral de Zona tamén lle deu a razón a Compostela Aberta e recolleu as alegacións formuladas contra a denuncia do PSOE sobre uns videos promocionados nas redes sociais de CA da presentación da candidatura. A denuncia foi desestimada, ao entender que non hai ningún incumprimento da Lei Orgánica do Réxime Electoral Xeral.
