Compostela Aberta urxiu hoxe ao Goberno local a “darlle un novo pulo ao programa Colecamiños e a atender as demandas de diferentes comunidades educativas para que a iniciativa chegue a novos centros escolares, alén dos tres nos que foi implantado no pasado mandato”. O concelleiro Xan Duro lamentou “a falta de interese mostrada polo actual goberno nesta experiencia, que foi pioneira en Santiago e na que no remate do pasado mandato participaban máis de 150 nenos e nenas”
Xan Duro explicou que nos últimos meses “Compostela Aberta tén recollida a demanda de diferentes centros educativos para que se habiliten camiños escolares seguros para o seu alumnado, como é o caso do López Ferreiro, o CEIP de Vite ou o Apóstolo Santiago”. O concelleiro incidiu en que “cónstanos que o Goberno tamén é sabedor de que existe este interese, pero a realidade é que nada tén feito o equipo de Bugallo para impulsar e reforzar os Colecamiños”. De feito, indicou, “neste mandato non se fixo absolutamente nada para mellorar o proxecto, que este Goberno recibiu en pleno funcionamento grazas ao esforzo do departamento de Educación Viaria da Policía Local, con tres colexios participantes e máis de 150 nenos e nenas inscritas na APP do programa”. Para Xan Duro, “a mellor mostra da deixadez do Goberno en relación a esta experiencia pioneira son as escasas referencias ao Colecamiños na web municipal ao longo dos últimos tres anos e medio, unha falta de noticias e de promoción por parte do Concello que podería acabar repercutindo na perda de interese por parte das familias”.
O proxecto de camiños escolares seguros “Colecamiños” naceu para fomentar a autonomía entre os nenos e nenas de Educación Infantil e Primaria, que grazas ao programa poden asistir ao colexio de maneira segura, poñendo en práctica os conceptos de educación viaria que lle son inculcados nas aulas, e recuperando o uso do espazo público. Ao tempo, o programa permite fomentar modos de desprazamento máis sostibles, reducindo o uso do vehículo privado por parte das familias; e mesmo favorece a socialización entre as crianzas. Ao remate do pasado mandato, nos Colecamiños participaban 58 nenos e nenas do CEIP Pío XII, 50 do Raíña Fabiola, e 44 do Ramón Cabanillas.