A portavoz municipal de Compostela Aberta esixiulle hoxe ao Goberno que dea todas as explicacións, tras coñecerse que o local que fora alugado polo exconcelleiro de Medio Rural a unha empresa da súa propiedade estaba a desenvolver a súa actividade sen título municipal habilitante. Así se recolle nun decreto no que o propio Goberno ordena á empresa Desproi o peche do local e a suspensión da actividade de centro de negocios, alugueiro de oficinas e almacén, que desenvolve baixo o nome comercial “Cadoiro Centro de Negocios”. Este decreto tén data de sinatura do pasado 17 de abril, e nel dábaselle á empresa un prazo de 5 días para cumprir coas medidas requiridas.
O decreto, asinado pola concelleira de Urbanismo, tamén recolle a incoación dun procedemento de reposición da legalidade urbanística alterada a Desproi, por desenvolver uinha actividade sen título municipal habilitante, e concédelle á empresa un prazo de 15 días para presentar alegacións. O decreto tén a súa orixe nun informe emitido de oficio por un técnico da administración xeral, con data do 16 de marzo. Nese informe recóllese que no edificio executáronse obras sen título habilitante, e que as actividades que se desenvolven nel tamén carecen dese título municipal. O técnico dá conta da situación ao departamento de Disciplina Urbanística e advirte, ademais, que o uso de oficinas que se desenvolven no soto 2 do edificio non é legalizable.
A portavoz municipal de Compostela Aberta pediulle ao Goberno que explique se a empresa lle tén dado xa cumprimento aos requirimentos deste decreto. Para María Rozas, “este é un novo capítulo que sementa todas as dúbidas sobre o caso Desproi, e volve demostrar o que Compostela Aberta vén denunciando: que as responsabilidades non rematan no dimitido concelleiro Pichel”. A concelleira insistiu en que “estas últimas informacións volven xerar dúbidas sobre a conveniencia de que o propio Goberno derive este expediente á Fiscalía, unha opción que descartou e que vinculou a un informe xurídico que Compostela Aberta tén solicitado e que seguen sen facilitarnos”.
Tal e como denunciou Compostela Aberta no pasado mes de xaneiro, o Goberno de Bugallo alugou en setembro de 2021 a nave de Desproi, empresa vinculada ao entón concelleiro José Manuel Pichel, para acoller os servizos municipais de Medio Rural e Parques de Xardíns. Ese contrato contiña numerosas irregularidades, que foran advertidas pola propia Intervención Municipal que o considerou nulo de pleno dereito, e foron moitas as cuestións que o Goberno non aclarou ao respecto: por que se elixiu esta nave sen visitar ningunha outra, por que se fixo unha visita a esta nave cinco días antes de redactar o informe das necesidades que tiñan os departamentos municipais, por que se tardou máis de 15 días en asinar o contrato de alugueiro desde que se acordara na Xunta de Goberno, tempo no que Pichel se desfixo das súas últimas participacións na empresa; ou por que o contrato se fixo finalmente por un ano de duración, cando o acordo da Xunta de Goberno falaba de 4 meses.
