Compostela Aberta levará ao Pleno da próxima semana un rogo para que a veciñanza da rúa Presidente Salvador Allende poida acceder ás tarxetas para estacionar na zona de residentes de San Lourenzo. Para o grupo municipal de CA, “é incomprensible que o Goberno veña de ampliar esta área incluíndo prazas da rúa Salvador Allende, e que as persoas que residen nela non teñan dereito a utilizalas”.
O pasado 20 de xullo, a Xunta de Goberno acordou a ampliación da zona 7 de aparcamento de residentes (San Lourenzo), con 39 novas prazas. Delas, 12 sitúanse na rúa de Salvador Allende, no seu tramo final fronte ao colexio Raíña Fabiola. O 10 de agosto abriuse o prazo de solicitude das tarxetas de aparcamento, para a veciñanza de rúa das Hortas, Calzada do Carme de Abaixo, Campo das Hortas, Entregaleras e Galeras (entre os números 2 e 32).
Para o concelleiro de Compostela Aberta Xan Duro, “excluír aos residentes de Salvador Allende do reparto de tarxetas supón unha clara discriminación destes veciños e veciñas”. O edil lembra que os edificios desta rúa foron construídos nos anos 90, e moitos dos pisos non teñen praza de garaxe asociada, “polo que non hai diferenzas entre estes veciños e veciñas e os que viven en calquera outro dos puntos da zona de residentes 7”.
PODES CONSULTAR AQUÍ O ROGO DO GRUPO MUNICIPAL DE COMP08TELA ABERTA PARA AMPLIAR A ZONA VERDE DE ESTACIONAMENTO Á VECIÑANZA DA RÚA PRESIDENTE SALVADOR ALLENDE
