Compostela Aberta trasladoulle hoxe o seu apoio aos traballadores do servizo de recollida do lixo e limpeza viaria, que veñen de convocar unha folga a partir do próximo día 15. María Rozas e Xan Duro mantiveron esta tarde unha xuntanza co comité de empresa de Urbaser, que incidiu en que as súas reclamacións non son novas, e o Goberno de Bugallo segue manténdose na inacción dos últimos meses”.
María Rozas explicou que o presidente do comité de empresa deu conta dos motivos da folga indefinida convocada hoxe que, salienta, “non tén motivos económicos, senón que atende ao incumprimento doutras cuestións consolidadas desde hai moitos anos, como a conciliación, as rotacións, ou mesmo a falta de medios materiais”. O persoal de Urbaser reiterou o seu malestar co Goberno local, “que segue sen mediar no conflito, despois de moitos meses de denuncias que mesmo chegaron ao Pleno da Corporación”
A portavoz de CA pediulle ao Goberno “que atenda as súas competencias, porque o da recollida do lixo é un servizo municipal e é a súa obriga garantir que se cumpra o contrato, que leva máis dun ano en vigor, e que se respecten os dereitos laborais dos traballadores e traballadoras”. Para María Rozas, “o alcalde debera dedicar menos tempo a enviarlle cartas propagandísticas á veciñanza para falar de supostas melloras no contrato, e máis tempo a garantir a calidade do servizo do lixo”
