• A marcha que solicita a paralización dos proxectos eólicos en tramitación partirá ás 12.00 horas da Alameda, co apoio de máis de 130 colectivos ecoloxistas, sociais e culturais

  Compostela Aberta vén de adherirse ao manifesto “Eólica, así non!”, impulsado por máis de 20 colectivos e plataformas ecoloxistas, sociais, culturais, veciñais e sindicais, e que conta co apoio de máis dun cento de entidades de toda Galicia. CA fai un chamado á participación na manifestación convocada para mañá, na que se vai demandar a paralización dos proxectos eólicos que están en tramitación. A marcha partirá ás 12.00 horas da Alameda de Santiago, e finalizará na Praza do Obradoiro coa lectura do manifesto.

Compostela Aberta respalda a petición da derrogación do Plan Sectorial Eólico, así como das leis de fomento da implantación de iniciativas empresariais e de simplificación administrativa que, como sinala o maniffesto, “representan un atropelo contra a participación pública e a preservación do medio, o patrimonio e a paisaxe”. Nesa liña, o manifesto “Eólica, así non!” denuncia que a Xunta concibe e permite a implantación eólica cun modelo que se basea “na desregulamentación legal, o abuso das empresas enerxéticas ás poboacións afectadas, a destrución de patrimonio público e colectivo, e intereses de carácter privado e especulativo”.

CA xa tén levado ao Pleno da Corporación unha proposta para instar ao Parlamento de Galicia a aprobar un novo marco normativo para unha transición enerxética xusta e democrática, comezando pola aprobación dun novo Plan Eólico baixo os parámetros de sustentabilidade, participación pública, participación cidadá e preservación dos valores paisaxísticos, ambientais e sociais. Foi no marco dunha moción xenérica para instar ao Parlamento e á Xunta a manter e ampliar as garantías lexislativas ambientais e a transparencia e acceso á documentación pública das iniciativas empresariais galegas, que foi aprobada no Pleno de decembro de 2020 cos únicos votos en contra do PP.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies