- María Rozas considera “difícilmente explicable que nos dous últimos anos, en plena crise, se concederan a metade de axudas deste tipo que en 2018”
A concelleira de Compostela Aberta María Rozas reclamou hoxe a posta en marcha dunha campaña de difusión e información sobre as axudas de rescate social previstas na Ordenanza de Garantía Básica, e máis en concreto da prestación de habitabilidade e pobreza enerxética. Para a edila, “é incomprensible que nos dous últimos anos, nun contexto de importante crise económica e social, se concederan moitas menos axudas deste tipo que en 2018”. Para Rozas, “o Goberno debe avaliar que está acontecendo con estas prestacións, porque é evidente que son máis necesarias que nunca e urxe coñecer os motivos polos que a poboación non está recorrendo a elas”.
María Rozas, que preguntará no próximo Pleno por esta cuestión, explicou que a Ordenanza de Garantía Básica aprobada durante o pasado mandato contempla varias prestacións económicas de carácter extraordinario e puntual, destinadas a atender siuacións de emerxencia. Entre elas atópanse as de habilitabilide e pobreza enerxética, “para atender débedas por subiministro de luz e/ou gas que procedan dun impagamento puintual, ou gastos asociados a altas de contratos de subministración enerxética dunha nova vivenda, e que poden chegar a cubrir o 100% deses gastos”. Estas prestacións, salientou a concelleira, “son compatibles con outras como a RISGA ou o Ingreso Mínimo Vital, e polo tanto o aumento na concesión destas axudas ás que adoita referirse a concelleira de Políticas Sociais non xustifica que non se estean a conceder as prestacións municipais de pobreza enerxética”.
Para María Rozas, “é difícil de entender que no ano 2018 se concederan 21 prestacións de rescate social de habilitabilidade e pobreza enerxética, e que no ano 2020, no máis duro da pandemia da Covid, só se concederan 11”. A situación non mellorou en 2021, “e a 30 de novembro dese ano só se tramitaran 7 axudas deste tipo”. A concelleira de CA lembrou que “estamos nun contexto de crise económica e de fortes subas da factura eléctrica, e iso fai ainda máis incomprensible a evolución que tivo a concesión destas prestacións”. Por iso, Rozas pedirá no Pleno que o Goberno explique estes datos, e que dea conta das campañas de difusión e información que ten previsto poñer en marcha para que a poboación compostelá sexa coñecedora destes recursos que tén ao seu dispor.
PODES CONSULTAR AQUÍ A PREGUNTA ORAL DO GRUPO MUNICIPAL DE COMPOSTELA ABERTA SOBRE AS PRESTACIÓNS DE RESCATE SOCIAL DE POBREZA ENERXÉTICA DA ORDENANZA DE GARANTÍA BÁSICA
