A portavoz municipal de Compostela Aberta pediulle hoxe ao alcalde que explique públicamente cales son os motivos do cese de Javier Fernández á fronte da concellería de Centros Socioculturais, publicado hoxe no Boletín Oficial da Provincia. Para María Rozas, “Bugallo debe aclarar que foi o que o levou finalmente a tomar esta decisión, despois de moitos meses desoíndo as queixas do persoal do servizo, ignorando as advertencias da oposición, e defendendo o indefendible nos Plenos da Corporación”. Para a concelleira de CA, “que o edil sexa apartado do departamento é unha boa noticia, pero o sorprendente é que esta medida sexa adoptada a seis meses das eleccións”.
O Boletín Oficial da Provincia publica hoxe o anuncio de modificación de delegacións asinado polo alcalde, polo que lle retira as competencias de centros socioculturais a Javier Fernández en favor de Mercedes Rosón. No decreto, o alcalde xustifica a decisión na necesidade de darlle un novo pulo aos CSCs despois da pandemia e de mellorar a súa coordinación coa actividade cultural. Para a portavoz de Compostela Aberta, “é evidente que as razóns do cese de Javier Fernández son outras, e teñen máis que ver cunha nefasta xestión da que somos conscientes desde hai moitos meses”. María Rozas lembrou que “os traballadores de Centros Socioculturais levan desde o mes de abril nunha situación de folga intermitente e desde o comezo do conflito o concelleiro mantivo un comportamento inadmisible, que Bugallo avalou durante todo este tempo”. A concelleira lembrou que “o comité de empresa dos CSCs denunciou, mesmo policialmente, ao edil por abuso de poder e acoso laboral, e é sorprendente que Bugallo estivera calado todo este tempo, e adopte agora esta decisión a seis meses das eleccións municipais”. Para Rozas, “tamén é chamativo que o alcalde faga unha modificación na delegación das súas competencias e non rinda contas dos motivos, senón que opte por facelo pola porta de atrás, coa publicación no BOP de hoxe dun decreto que xa asinou o 14 de novembro”.
