- A concelleira de CA pide explicacións polo anuncio de Bugallo de que non se vai recuperar a Cabalgata de Reis este Nadal
Branca Novoneyra lamentou hoxe que o Goberno local “vaia en contra das actuais tendencias de revaloración do rural, e opte, como é tradición en Bugallo, por desatender á súa veciñanza”. A concelleira de Compostela Aberta denunciou “o desmantelamento das actividades da Rede de Centros Socioculturais nas parroquias”, e reclamou medidas para recuperar o calendario que existía antes da pandemia.
Branca Novoneyra denunciou que “os centros do rural teñen neste curso unha menor oferta de actividades, reducíronse os grupos para o seu desenvolvemento, e impuxéronse tamén algunhas restricións no uso destes espazos que nada teñen que ver coa pandemia da Covid”. A concelleira de Compostela Aberta afirmou que “as asociacións están facendo un esforzo a maiores para manter moitas propostas que foron suprimidas polo Concello, para que a veciñanza manteña a oferta á que estaba afeita”. Por este motivo, CA reclamará no próximo Pleno a recuperación inmediata das horas de actividades suprimidas nos locais e centros socioculturais do rural.
A concelleira tamén lle pide ao Goberno que abra unha convocatoria para desenvolver actividades nas parroquias o próximo ano, dotada cun mínimo de 30.000 euros. O obxectivo, apuntou Novoneyra, “é que as actividades nas parroquias non se limiten ás realizadas nos equipamentos socioculturais, fomentando propostas en zonas abertas e en espazos que deben ser postos en valor e que moitas veces son descoñecidos para a xente que non ten vencello directo con eses lugares”. A concelleira de Compostela Aberta lembrou que “a pandemia da Covid revalorizou estes espazos, por canto achegan a oportunidade para o fomento de hábitos de vida saúdable e mesmo axudan á desconxestión do centro das cidades, pero en Santiago o Goberno de Bugallo parece ir contracorrente e optar por esquecerse do riquísimo rural de Compostela”.
Supresión da Cabalgata de Reis
Branca Novoneyra tamén lle pediu explicacións ao Goberno, despois de que o alcalde asegurara onte, nunha entrevista radiofónica, que non se vai recuperar a Cabalgata de Reis este Nadal. Para a concelleira de CA, “é incomprensible que non se celebre o desfile, cando veñen de levantarse as restricións por mor da pandemia da Covid e cando falamos, ademais, dun acto que se desenvolve ao aire libre”. Ainda que Bugallo xustificou a decisión nos prazos para a convocatoria dun concurso público para a organización do desfile, Novoneyra lembrou que “unha parte importante da Cabalgata podería facerse, precisamente, coa implicación da Rede de Centros Socioculturais, como se viña facendo habitualmente”. Ademais, apuntou que a Cabalgata adoita organizarse a través de diferentes contratos menores, como tamén se fará previsiblemente co acto de recepción en Bonaval que Bugallo di que se vai manter este Nadal e que o ano pasado supuxo un gasto de case 60.000 euros en contratos menores”.
PODES CONSULTAR AQUÍ A MOCIÓN DO GRUPO MUNICIPAL DE COMPOSTELA ABERTA PARA A RECUPERACIÓN DUNHA OFERTA DIVERSA E INCLUSIVA DE ACTIVIDADES PARA OS LOCAIS E CENTROS RURAIS DA REDE DE CSC
