- CA considera que os establecementos de ocio nocturno de Compostela non se poden equiparar coas grandes discotecas e pubs doutras localidades, e deben poder traballar nos horarios doutros locais de hostalería
Compostela Aberta manifestou hoxe o seu apoio á Asociación de Bares, Pubs e Discotecas de Compostela -e ao conxunto do tecido asociativo da hostalería de Santiago- que vén mostrando a súa preocupación polas medidas indiscriminadas adoptadas pola Xunta de Galicia en relación ao ocio nocturno. O grupo municipal de CA entende que o Goberno galego está na obriga de procurar solucións para un sector que emprega a millares de persoas no noso país, dentro do marco xeral de precaución e coidado da saúde pública que debe primar no actual contexto da pandemia da Covid-19. Do mesmo xeito, Compostela Aberta instou ao Goberno local a que, dentro das súas competencias, procure alternativas que impidan o peche de ducias de establecementos de Santiago. Nesa liña, CA lembra que existe a posibildiade de que os establecementos de ocio nocturno obteñan licenza para actividades complementarias a través dunha declaración responsable.
Compostela Aberta considera que a saúde pública é prioritaria sobre calquera outra cuestión, pero lamenta que as ordes dictadas pola Xunta en relación ao ocio nocturno “sexan indiscriminadas e máis restrictivas que as normas que lle afectan a calquera outro sector, e non vaian acompañadas de medidas de apoio e reactivación”. O grupo municipal de CA urxe ao Goberno galego a “non demorar máis a revisión da orde publicada o pasado día 18, que deixa na indefensión a milleiros de establecementos, moitos deles na nosa cidade” e insta ao goberno de Bugallo a que lle esixa á Xunta esa modificación canto antes. Para Compostela Aberta, a Xunta non ten en consideración as particularidades do ocio nocturno de Santiago ao indicar na sua orden que “entenderanse por establecementos de lecer nocturno, para os efectos do establecido nestas medidas, as discotecas, pubs, cafés-espectáculo, salas de festas, así como as salas de concertos (…) A medida será de aplicación tanto respecto do interior dos locais como das terrazas destes establecementos”.
Licenzas complementarias
Á espera de que a Xunta corrixa a súa orde, Compostela Aberta lembra que “o Goberno local tén a posibilidade de aplicar a normativa municipal a favor dos locais, porque na actualidade está equiparando pubs e establecementos que teñen licenza de café-bar especial e que traballaban en horario diurno, mesmo en terrazas”. Ademais, Jorge Duarte explica que existe a posibilidade de que os establecementos afectados pola orde de peche da Xunta soliciten unha licenza para actividade complementaria que lles permitiría traballar en horario diurno. O concelleiro lembra que o Goberno de Compostela Aberta aprobou en 2018 a modificación da “Ordenanza reguladora de emisión de ruídos, vibracións e condicións dos locais”, para incorporar no seu artigo 22 un apartado no que se sinala que “nos establecementos públicos dedicados a máis dun tipo de espectáculos, á prestación de máis dunha clase de servizos ou ao desenvolvemento de máis dunha categoría de actividades recreativas compatibles, cumprirá que conste esa circunstancia nos títulos habilitantes”. Nesa liña, incorporouse tamén unha Disposición Transitoria Terceira que sinala que “Os establecementos que pretendan ofertar espectáculos, servizos ou desenvolver actividades complementarias ou adicionais que non consten nos seus títulos habilitantes deberán presentar a correspondente declaración responsable”.
O concelleiro Jorge Duarte lembra que estas modificacións foron incorporadas á ordenanza para solucionar o problema xurdido coa música ao vivo, “pero agora permitiría que moitos pubs teñan unha licenza complementaria para poder abrir e traballar durante o día, garantindo a súa supervivencia e os seus postos de traballo”. O edil instou ao Goberno local a “activar e facilitar esta solución para todos aqueles establecementos que queiran manter a súa actividade económica”.