- CA leva ao Pleno as demandas da Coordinadora Galega polo Tren Público Social e Sostible
Compostela Aberta advertiu hoxe que “a posta en funcionamento, por fin, do tren de alta velocidade non pode facernos esquecer demandas históricas e compromisos incumpridos con Galicia como a creación dun servizo de tren de proximidade que axude a vertebrar o país e que se converta nunha verdadeira alternativa para un modelo de mobilidade máis sostible”. Así o explicou o concelleiro Xan Duro, que lembrou que “a nosa é a única comunidade do litoral da península que non dispón deste servizo de ferrocarril de proximidade, e unha das que máis sufriu as consecuencias de que os investimentos en materia ferroviaria ficasen reducidos tan só ás liñas do AVE, coa redución de horarios e frecuencias nas liñas convencionais”.
Tal e como está anunciado, o próximo luns terá lugar a viaxe inaugural da liña do AVE Madrid-Galicia, na que participarán representantes dos Gobernos central e autonómico e tamén o alcalde de Santiago. Para Compostela Aberta, “a chegada da Alta Velocidade, iso sí, despois de 18 anos de proxectos, obras e anuncios, non pode facernos esquecer as carencias que temos en materia ferroviaria, que supoñen unha enorme perda de oportunidades e repercuten moi negativamente na cidadanía”. Xan Duro lembrou que, tal e como denuncia a Coordinadora Galega polo Tren Público Social e Sostible, “o esforzo orzamentario que se fixo no AVE foi a costa dun completo abandono doutros servizos, e iso acabou motivando a redución das frecuencias nas liñas que unen Galicia coa Meseta ou con Portugal, o incremento dos prezos das liñas de longa distancia e, sobre todo, a supresión dos trens rexionais”. Estas liñas de proximidade, apuntou o concelleiro de Compostela Aberta, “deberan ser consideradas estratéxicas para termos unha mobilidade máis sostible desde o punto de vista económico e, sobre todo, ambiental, porque o ferrocarril é un dos modos de transporte con menores emisións que, ben planificado desde unha óptica da proximidade, podería converterse nunha alternativa real ao transporte por estrada, tamén para as mercadorías”. En definitiva, explicou o edil, “o ministerio de Fomento debe mudar as políticas dos últimos anos, que supuxeron o peche de ducias de estacións e a supresión de máis dun milleiro de paradas de tren en Galicia”.
Vertebración territorial
Ademais, Xan Duro incidiu no papel que debera xogar o tren de proximidade na vertebración do territorio, “sacando do illamento a determinadas vilas e mesmo zonas rurais, e contribuíndo a paliar o baleirado destes núcleos”. Por iso, o concelleiro de CA apostou pola creación dunha rede de trens de proximidade en Galicia, “na que Santiago contara cando menos cunha liña a Vigo e A Coruña, e outra a Ourense, pasando polo Carballiño”.
Compostela Aberta levará ao próximo Pleno as demandas da Coordinadora Galega polo Tren Público Social e Sostible, que vén de aprobar un manifesto no que, entre outras moidas medidas, reclama que se free a eliminación progresiva dos servizos de transporte ferroviario, se incrementen os investimentos na renovación das liñas do tren convencional, se redeseñe a oferta de servizos das empresas ferroviarias públicas para garantir as conexións dos servizos rexionais cos de grandes distancias, e que se garanta o acceso universal ao tren ás persoas usuarias, tamén en termos de asequibilidade.