- O PSOE limitouse a anunciar a próxima presentación dun informe técnico sobre as contas, nunha xuntanza convocada despois de que Martiño Noriega denunciara que non houbera ningún contacto sobre os orzamentos
Días despois de que o portavoz de Compostela Aberta denunciara que o Goberno non mantivera ningún contacto con CA por mor da presentación dos orzamentos municipais, esta mañá celebrouse unha xuntanza entre a concelleira de Economía e Facenda, Marta Abal, e o propio Martiño Noriega. Á reunión tamén asistiron a viceportavoz de Compostela Aberta, Marta Lois, e o concelleiro de Presidencia, Relacións Institucionais e Turismo, Gumersindo Guinarte. A xuntanza rematou sen ningún avance, posto que os concelleiros do Goberno limitáronse a anunciar a próxima presentación dun “informe técnico” sobre o proxecto de orzamentos.
Martiño Noriega lamentou que o primeiro contacto sobre os orzamentos “se produza a só catro días do Pleno no que van ser sometidos a votación, e cando o PSOE de Bugallo xa ten garantido que o PP non obstaculizará a aprobación das contas”. O portavoz de Compostela Aberta volveu lamentar que “o Goberno socialista prefira virar á dereita e pactar co Partido Popular, sen ter tido ningún contacto previo coa chave da maioría progresista da Corporación”. Nesa liña, o concelleiro incidiu en que “PP e PSOE pactan uns orzamentos que insisten en presentar como técnicos cando neles hai decisións políticas que únicamente teñen o obxectivo de borrar a pegada de CA, como a desaparición dos proxectos comprometidos no proceso de Orzamentos Participativos, a baixada das partidas de Emprego ou Políticas Sociais, e mesmo a supresión de actuacións importantes como a construción do muro de Fontiñas mentres se incrementa en 600.000 euros o capítulo de Festas”.
O portavoz de Compostela Aberta explicou que na xuntanza desta mañá “Marta Abal insistiu no seu discurso de que é preciso aprobar uns orzamentos para facer fronte ás obrigas que tén o Concello, obviando que foi o seu partido, o PSOE, quen quixo levar á administración local a esta situación impoñendo o bloqueo dos orzamentos municipais unicamente por motivos electoralistas”.
