O Goberno de Compostela Aberta deixou máis de trinta proxectos de obras listos para licitar, e nos seis meses de Goberno do PSOE tan só se abriu ese procedemento en tres deles. É a denuncia que hoxe formulou o concelleiro Rafael Peña, que levará ao Pleno do xoves unha pregunta ao respecto. O edil chamou a atención sobre “a escasa capacidade do executivo de Bugallo para mover os expedientes que lle quedaron pechados, e que se refiren a actuacións nalgúns casos demandadas historicamente pola veciñanza”.
Rafael Peña explicou que “o equipo de Bugallo leva celebradas, coa desta mañá, 41 Xuntas de Goberno Local, das que 16 tiveron carácter extraordinario”. Nelas, só se iniciou a licitación de dous proxectos: a construción da senda peonil na rúa de San Martiño de Aríns, orzado nalgo máis de 400.000 euros; e a mellora e acondicionamento do local sociocultural da Grixoa, cun tipo de licitación de 55.000 euros. Ademais, quedou adxudicado o contrato de adecuación da instalación eléctrica da piscina e do ximnasio de Santa Isabel, por 70.000 euros. A maiores, iniciouse a licitación da reforma de Clara Campoamor, despois de e do acondicionamento do palacete da Finca do Espiño, “unha actuación que quedou deserta”.
Goberno pouco produtivo
O concelleiro de Compostela Aberta relatou que “tal e como consta no informe do traspaso e poderes, o Goberno de CA deixou case trinta proxectos aprobados e dos que se podería iniciar a licitación”. Trátase, apuntou, “de actuacións que eran demandadas pola veciñanza, que nalgúns casos se atrasaron por cuestións alleas ao Concello como os permisos sectoriais doutras administracións”. Para Rafael Peña, “é preocupante que cando está a piques de rematar o ano, non saibamos nada nin destes proxectos nin dos que pretende incluír o Goberno do PSOE nos seus orzamentos de 2021”.
Sen desculpas orzamentarias
Ademais, o concelleiro explicou que “boa parte dos proxectos que poderían licitar son financiados con cargo aos Plans de obras da Deputación da Coruña, e polo tanto non dependen dos orzamentos municipais”. Outros, apuntou Rafael Peña, foron incorporados aos orzamentos técnicos de 2019, polo que tamén se podería aprobar o procedemento de adxudicación. O edil de Compostela Aberta lembrou, por último, que “existe a posibilidade de tramitar anticipados de gasto para poder iniciar as licitacións, e poder executar as obras nos meses de verán”.
PODES CONSULTAR AQUÍ A PREGUNTA DE CA SOBRE A LICITACIÓN DE PROXECTOS