• A concelleira de Compostela Aberta sostén que “a capital galega téno todo para obter ese recoñecemento, que sería un pulo en tempos de incerteza para o sector”

Compostela Aberta pediralle no próximo Pleno ao Goberno local que inicie as xestións necesarias para presentar a candidatura de Santiago para ser recoñecida pola UNESCO como Cidade Creativa da Música. A concelleira Branca Novoneyra incidiu en que “Compostela téno todo para optar a esa distinción, para consolidarse como territorio musical de referencia, e para facer dese recoñecemento un  valor para un sector que afronta momentos de precariedade, incerteza e medo despois da pandemia da Covid”,

A Rede de Cidades Creativas da UNESCO creouse en 2004 para promover a cooperación entre as cidades que identifican a creatividade como factor estratéxico de desenvolvemento urbano sostible. A rede conta con diferentes áreas, como son a Literatura, a Gastronomía, o Cine ou a Música. Na moción que levará ao Pleno deste mes, Branca Novoneyra insta ao Goberno a presentar a candidatura de Santiago na categoría de Música, “porque a nosa identidade está fortemente ligada á música como valor cultural vivo no territorio”. Nese sentido, a concelleira referiuse á importante presenza e tradición musical na capital de Galicia, “que se traduce en iniciativas públicas e privadas relacionadas  co ensino, como o Conservatorio Profesional ou a Escola Municipal de Música; con entidades profesionais como a Real Filharmonía ou a Banda Municipal; con agrupacións de música e danza tradicional centenarias, cos numerosos festivais vinculados a Santiago, ou coa importancia que a música ao vivo sempre tivo na nosa cidade”.

Pulo en tempos de incertezas

Branca Novoneyra sinalou que a última convocatoria da UNESCO en relación á Rede de Cidades Creativas foi deste ano, “polo que Santiago tería un prazo de dous anos para traballar unha candidatura solvente de cara á próxima convocatoria, que se prevé para 2023”. A concelleira de Compostela Aberta incidiu en que este recoñecemento “podería servir de pulo para o sector cultural, nun momento de incertezas despois da crise da Covid”. Ademais, mostrouse convencida de que “permitiría tamén reorientar o apoio á música por parte das institucións públicas, unha reflexión que se fai necesaria tendo en conta o actual contexto da pandemia, marcado polas restricións no aforo e os protocolos sanitarios e plans de seguridade que se traducen en maiores gastos de produción”. Nesa liña, Novoneyra incidiu en que “é preciso que o Concello de Santiago retome a música ao vivo como elemento da nosa singularidade e da identidade de Santiago, e procure fórmulas para garantir a oferta que sempre tivo a capital do país”

A concelleira de CA incidiu en que a capital galega “parte dunha boa posición para candidatarse á Rede de Cidades Creativas da UNESCO no eido da música, porque conta con espazos importantes como o Auditorio, diversidade de festivais, potencia autoral, e moito traballo feito para obter ese recoñecemento, co que non conta ningunha cidade galega”. No estado español, sinalou Novoneyra, só Lliria e Sevilla integran a rede na categoría de música, desde os anos 2019 e 2016 respectivamente.

PODES LER AQUÍ A MOCIÓN DO GRUPO MUNICIPAL DE COMPOSTELA ABERTA PARA QUE SANTIAGO DE COMPOSTELA SEXA NOMEADA CIDADE CREATIVA DA MÚSICA

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies