• Compostela Aberta preguntará no próximo Pleno polas medidas que vai adoptar o Goberno para que os traballadores sexan subrogados pola nova operadora da liña

O concelleiro de Compostela Aberta Jorge Duarte denunciou hoxe “o incomprensible pasotismo do Goberno local e en particular do alcalde, que un ano despois, e tendo sete sentenzas xudiciais sobre a mesa, segue sen mediar para lograr a subrogación dos conductores do autobús ao aeroporto que foron inxustamente despedidos en decembro de 2020”. Para o edil, “é intolerable este atraso, porque falamos de moitas familias prexudicadas polo desleixo do Concello desde que a Xunta lle derivou a competencia desa liña”.

Jorge Duarte lembrou que existen sete sentenzas do xulgado de primeira instancia que consideran improcedente o despido dos traballadores do servizo do autobús ao aeroporto. Eses fallos indican que o persoal tería que ser subrogado pola empresa que agora cobre esa liña, a UTE Trapsa-Tralusa, porque así se contemplaba no acordo da Xunta de Galicia coas empresas concesionarias das liñas de toda Galicia que pasaron a ser competencia municipal en decembro de 2020. Ainda así, a empresa decidiu pagar as indemnizacións e non subrogar ao persoal, unha decisión que foi recurrida ante o Tribunal Superior de Xustiza, que xa emitiu tamén unha sentenza ao respecto ratificando que os traballadores deben ser subrogados por Trapsa-Tralusa. 

O concelleiro de Compostela Aberta lamentou que “o Goberno de Bugallo non exercera a súa responsabilidade e mediara entre os traballadores e a nova empresa concesionaria para conseguir a subrogación, tal e como, ademais, se acordou no Pleno en xaneiro de 2021, a partir dunha proposición presentada por CA e de cadansúa moción de PP e BNG”. Para Jorge Duarte, “estamos diante dunha nova mostra da soberbia e da prepotencia deste alcalde, que considera que non tén nada do que falar cos traballadores e traballadoras de servizos esenciais, como xa fixo tamén co persoal de Urbaser”. O edil incidiu, ademais, en que a situación na que se atopan os conductores “é responsabilidade directa do Goberno do PSOE”. Nese sentido, lembrou que a Xunta de Galicia comunicou o traspaso da competencia da liña de autobús ao aeroporto en setembro de 2020, “e o Concello tivo case catro meses para adoptar medidas pero preferiu non estudar alternativas nin preocuparse pola situación do persoal”. A maiores, salientou Duarte, “Bugallo leva máis de dous anos e medio no Goberno e aínda non iniciou a licitación do servizo de autobuses, malia ter recibido no traspaso de poderes uns pregos moi avanzados para poñer en marcha o procedemento”.

PODES CONSULTAR AQUÍ A PREGUNTA DO GRUPO MUNICIPAL DE COMPOSTELA ABERTA SOBRE A SITUACIÓN DOS TRABALLADORES DA LIÑA DE AUTOBUSES AO AEROPORTO DE SANTIAGO – ROSALÍA DE CASTRO.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies